കോട്ടയം ∙ കോൺഗ്രസിൽ ഒരു പിളർപ്പുമില്ലെന്നും എല്ലാവരും ഒറ്റക്കെട്ടായാണ് പോവുന്നതെന്നും രമേശ്‌ ചെന്നിത്തല. ഡിസിസി ഏറ്റവും ഗൗരവത്തോടെയാണ് പരിപാടി സംഘടിപ്പിച്ചത്. അതിൽ അവരെ അഭിനന്ദിക്കുന്നു. ഉമ്മൻ ചാണ്ടിയുടെ ചിത്രം എങ്ങനെ ഒഴിവായി എന്നറിയില്ലെന്നും രമേശ്‌ ചെന്നിത്തല പറഞ്ഞു. അതേസമയം, ചിത്രം ഒഴിവായത് സംബന്ധിച്ച് നാട്ടകം സുരേഷ് പ്രതികരിച്ചില്ല
കോട്ടയത്തെ കോൺഗ്രസിൽ പോസ്റ്ററിന്റെ പേരിലുള്ള അടി രൂക്ഷമായി തുടരുകയാണ്. ബഫര്‍സോൺ വിരുദ്ധ സമര പരിപാടിയുടെ പോസ്റ്ററിൽനിന്നും ഉമ്മൻചാണ്ടിയുടെ ചിത്രം ഒഴിവാക്കിയത് ചോദ്യം ചെയ്ത യൂത്ത് കോൺഗ്രസ്‌ നേതാവിനെ ഡിസിസി ഓഫിസ് സെക്രട്ടറി മർദിച്ചതായി പരാതി ഉയർന്നിട്ടുണ്ട്. യൂത്ത് കോൺഗ്രസ്‌ പ്രവർത്തകൻ മനു കുമാറിനെ ലോഗോസ് ജംഗ്ഷനിൽവച്ച് ലിബിൻ ഐസക്ക് മർദിച്ചതായാണ് പരാതി. മനുകുമാറിന്റെ പുറത്ത് കല്ലുകൊണ്ട് ഇടിയേറ്റ പാടുണ്ട്. ചങ്ങനാശേരി ജനറൽ ആശുപത്രിയിൽ ചികിത്സയിലാണ് മനു.അതേസമയം, മനുകുമാറിനെതിരെ ലിബിൻ പൊലീസിൽ പരാതിപ്പെട്ടിട്ടുണ്ട്.
