കൊച്ചി : എടവനക്കാട്ട്‌ നായരമ്പലം സ്വദേശി രമ്യ (32)യുടെ കൊലയില്‍ കലാശിച്ചത് ഭര്‍ത്താവ് സജീവിനുണ്ടായ സംശയം. രമ്യക്ക്‌ രഹസ്യബന്ധമുണ്ടെന്ന്‌ സജീവ്‌ സംശയിച്ചിരുന്നതായി പൊലീസ് പറഞ്ഞു. ഇതിനെച്ചൊല്ലി ഇരുവരും പലപ്പോഴും വഴക്കിട്ടിരുന്നു. ഒടുവിൽ മക്കൾ രമ്യയുടെ വീട്ടിൽ പോയ സമയത്ത്‌ ആസൂത്രിതമായി ഇയാൾ കഴുത്തിൽ കയർ മുറുക്കി രമ്യയെ കൊലപ്പെടുത്തിയെന്നാണ്‌ മൊഴി.
രമ്യയും ഭർത്താവ് സജീവും എടവനക്കാട്ട്‌ രണ്ടുവർഷമായി വാടകയ്ക്ക് താമസിക്കുകയായിരുന്നു. കലൂരിലെ സൂപ്പർ മാർക്കറ്റിലെ ഫ്രൂട്ട്‌സ്‌ കൗണ്ടറിലാണ്‌ രമ്യ ജോലി ചെയ്‌തിരുന്നത്‌. ഭാര്യയെ കാണാനില്ലെന്ന പരാതി നല്‍കിയശേഷം പരാതിയില്‍ താൽപ്പര്യം കാണിക്കാതായതോടെ ഞാറയ്‌ക്കൽ പൊലീസ് സജീവിനെ ആറുമാസമായി നിരീക്ഷിച്ചുവരികയായിരുന്നു. കഴിഞ്ഞദിവസം സജീവിനെ കസ്റ്റഡിയിലെടുത്ത് ചോദ്യംചെയ്ത് വിട്ടയച്ചു. വ്യാഴം രാവിലെയും പൊലീസ് കസ്റ്റഡിയിലെടുത്ത് വിശദമായി ചോദ്യംചെയ്തപ്പോഴാണ് കൊലപാതകവിവരം പുറത്തുവന്നത്.
