കൊണ്ടോട്ടി: ഇഎംഇഎ ഹയർ സെക്കൻഡറി സ്‌കൂളിൽ പതിനാലുകാരിയായ വിദ്യാർഥിനിയോട് മോശമായി പെരുമാറിയെന്ന പരാതിയിൽ അധ്യാപകൻ അറസ്റ്റിൽ. ലീഗ് അനുകൂല അധ്യാപക സംഘടനാ പ്രവർത്തകനും ലീഗിന്റെ സജീവ പ്രവർത്തകനുമായ ഹൈസ്‌കൂൾ അധ്യാപകൻ കരിപ്പൂർ കുമ്മിണിപറമ്പ്‌ സ്വദേശി പി എ ഷെമീർഅലി മൻസൂറിനെയാണ് കൊണ്ടോട്ടി പൊലീസ് അറസ്റ്റ് ചെയ്‌തത്‌.
ബുധൻ ഉച്ചയോടെ തിരൂരിലെ വെട്ടം ആശുപത്രിയിൽനിന്നാണ് ഇയാളെ പിടികൂടിയത്. സംഭവശേഷം ഇവിടെ ഒളിച്ചുകഴിയുകയായിരുന്നു. മലപ്പുറം ഫസ്റ്റ് ക്ലാസ് മജിസ്ട്രേട്ട് കോടതിയിൽ ഹാജരാക്കി റിമാൻഡ്‌ ചെയ്തു. ഇയാൾക്കെതിരെ പോക്സോ നിയമപ്രകാരമാണ് കേസെടുത്തത്. വിദ്യാർഥിനിയുടെ രക്ഷിതാക്കളുടെ പരാതിയിലാണ്‌ നടപടി. സ്‌കൂളിലെ മറ്റൊരു വിദ്യാർഥിനിയോട് മോശമായി പെരുമാറിയതിന്‌ മാനേജ്മെന്റ്‌ അധ്യാപകനെ മുമ്പ്‌ സസ്‌പെൻഡ്‌ ചെയ്‌തിരുന്നു. പിന്നീട് തിരിച്ചെടുത്തു.
