തിരുവനന്തപുരം: പാഴ് വസ്തുക്കളുടെ ശേഖരണത്തിനായി ‘ആക്രി കട’ ആപ്പ് പുറത്തിറക്കി. കേരള സ്ക്രാപ്പ് മെർച്ചന്റ്സ് അസോസിയേഷന്റെ (കെഎസ്എംഎ) നേതൃത്വത്തിൽ പുറത്തിറക്കിയ ആപ്പിന്റെയും വെബ്സൈറ്റിന്റെയും ഉദ്ഘാടനം വ്യവസായ മന്ത്രി പി രാജീവ് നിർവഹിച്ചു.
വീടുകളിലെ ഉപയോഗ ശൂന്യമായ വസ്തുക്കളുടെ ചിത്രം പൊതുജനങ്ങൾക്ക് ആപ്പിൽ അപ്ലോഡ് ചെയ്യാം. ഈ ചിത്രങ്ങൾ അടുത്ത പ്രദേശങ്ങളിൽ പ്രവർത്തിക്കുന്ന കെഎസ്എംഎ അംഗങ്ങളായ വ്യാപാരികൾക്ക് ലഭിക്കും. തുടർന്ന് അവർ വ്യക്തിയുമായി നേരിട്ട് ബന്ധപ്പെട്ട് പാഴ്വസ്തുക്കൾ ശേഖരിക്കും.
മാസ്കറ്റ് ഹോട്ടലിൽ നടന്ന ഉദ്ഘാടന ചടങ്ങിൽ കെഎസ്എംഎ സംസ്ഥാന പ്രസിഡന്റ് വി എം കുഞ്ഞിമുഹമ്മദ് അധ്യക്ഷനായി. ജനറൽ സെക്രട്ടറി കെ പി എ ഷെരീഫ്, നഗരസഭ ആരോഗ്യ സ്ഥിരംസമിതി അധ്യക്ഷ ജമീല ശ്രീധർ തുടങ്ങിയവർ സംസാരിച്ചു.
