ആലുവ: മുതിർന്ന മാധ്യമ പ്രവർത്തകനും (റിട്ട. സീനിയർ കറസ്പോണ്ടന്റ് യു.എൻ .ഐ) പി.എം. മൊയ്തീൻ (73) അന്തരിച്ചു. പുലർച്ചെ എടയപ്പുറത്തെ വീട്ടിൽ നമസ്കരിച്ചു കൊണ്ടിരിക്കെ കുഴഞ്ഞുവീണ് മരിക്കുകയായിരുന്നു. വൈകിട്ട് 4ന് ആലുവ ചൊവ്വര തൂമ്പാക്കടവ് മസ്ജിദിലാണ് ഖബറടക്കം.
സീനിയർ ജേർണലിസ്റ്റ് യൂണിയൻ, എറണാകുളം മഹാരാജാസ് ഓൾഡ് സ്റ്റുഡന്റ്സ് നിർവാഹക സമിതി അംഗം എന്നീ നിലകളിൽ പ്രവർത്തിച്ചു വരികയായിരുന്നു. യുഎൻഐ ലേഖകനായിരിക്കെ കോട്ടയം, കോഴിക്കോട്, തിരുവനന്തപുരം പ്രസ് ക്ലബ് ഭാരവാഹിയായും എറണാകുളം പ്രസ് ക്ലബ് പ്രസിഡന്റായും സേവനമനുഷ്ഠിച്ചിട്ടുണ്ട്. ഡൽഹി, ചെന്നൈ നഗരങ്ങളിലും യുഎൻഐ ലേഖകനായി പ്രവർത്തിച്ചിട്ടുണ്ട്.
ഭാര്യ: മെഹർ (റിട്ട. സൂപ്രണ്ട്, മുനിസിപ്പൽ സർവിസ്). മക്കൾ: മിനു ഫാത്തിമ (അധ്യാപിക, മഹാരാജാസ് കോളജ് എറണാകുളം), മുഹമ്മദ് ഇംതിയാസ് (ദുബായ്), നദിയ മൊയ്തീൻ (ആസ്റ്റർ ഹോസ്പിറ്റൽ, കൊച്ചി). മരുമക്കൾ: സക്കീർ ഹുസൈൻ, ലല്ലു.
സഹോദരങ്ങൾ: പി.എം.അബ്ദുൾ ഖാദർ (റിട്ട. ഡപ്യൂട്ടി മാനേജർ കൊച്ചിൻ റിഫൈനറി ), ഐഷാ മൊഹിയുദ്ദീൻ, പി.എം.ഖാലിദ്, പി.എം.ഹംസ, പി.എം.അബ്ബാസ്, പി.എം മായിൻകുട്ടി (എഡിറ്റർ, മലയാളം ന്യൂസ്, ജിദ്ദ), ഹസീന മുഹമ്മദ് (ശ്രീമൂലനഗരം പഞ്ചായത്ത് മുൻ അംഗം).
