പാലക്കാട്: മണ്ണാര്ക്കാട് വീട്ടമ്മയെ കടന്നുപിടിച്ച കേസില് പ്രതിക്ക് ഒന്നര വര്ഷം തടവും 20000 രൂപ പിഴയും ശിക്ഷ. കരിമ്പുഴ തോട്ടരയില് നടന്ന സംഭവത്തിലാണ് കോടതി പ്രതിയെ കുറ്റക്കാരനെന്ന് കണ്ടെത്തി ശിക്ഷിച്ചത്. തോട്ടര പറമ്പോട്ട്കുന്ന് മുതീയിറക്കത്ത് റഷീദിനാണ് മണ്ണാര്ക്കാട് പട്ടികജാതി – പട്ടിക വര്ഗ പ്രത്യേക കോടതിയാണ് ശിക്ഷ വിധിച്ചത്. ശ്രീകൃഷ്ണപുരം പോലീസ് സ്റ്റേഷന് പരിധിയില് 2017 ജൂലായ് 14 നാണ് കേസിന് ആസ്പദമായ സംഭവം നടന്നത്. പട്ടികജാതി വിഭാഗത്തില് പെട്ട പരാതിക്കാരി, വീട്ടില് കിണറിനു സമീപം പാത്രം കഴുകുന്നതിനിടെയാണ് സംഭവം. സ്ത്രീകള്ക്ക് നേരെയുള്ള ക്രിമനല് ബലപ്രയോഗം (ഐപിസി 354) വകുപ്പ് അനുസരിച്ച് ഒരു വര്ഷം തടവും പതിനായിരം രൂപ പിഴയും ശിക്ഷ വിധിച്ചു. പട്ടികജാതിക്കാര്ക്ക് എതിരെയുള്ള അതിക്രമം തടയല് നിയമം അനുസരിച്ച് ആറ് മാസം തടവും പതിനായിരം രൂപ പിഴയും ശിക്ഷ വിധിച്ചു.
