കൊല്ലം : ചടയമംഗലത്ത് പ്രായപൂര്‍ത്തിയാകാത്ത പെണ്‍കുട്ടികൾക്കെതിരെ ലൈംഗിക അതിക്രമം നടത്തിയ രണ്ടുപേര്‍ പിടിയിൽ. പതിനാറുകാരിയെ പീഡിപ്പിക്കാന് ശ്രമിച്ച നാല്‍പത്തിമൂന്നുകാരനും പതിനാലുകാരിയുടെ നഗ്നദൃശ്യങ്ങള്‍ പകര്‍ത്തിയ യുവാവുമാണ് ചടയമംഗലം പൊലീസിന്റെ പിടിയിലായത്.
ചടയമംഗലം കള്ളിക്കാട് കോളനിയില്‍ താമസിക്കുന്ന രാജുവാണ് പതിനാറുകാരിയെ പീഡിപ്പിക്കാന് ശ്രമിച്ചത്. വീട്ടിൽ ആരുമില്ലാതിരുന്ന സമയത്ത് കടന്നുപിടിച്ച് പീഡിപ്പിക്കാൻ ശ്രമിച്ചെന്നാണ് കേസ്. വിവരം അറിഞ്ഞ് നാട്ടുകാര്‍ എത്തിയപ്പോഴേക്കും പ്രതി രക്ഷപെട്ടിരുന്നു. കുട്ടിയുടെ മാതാപിതാക്കള്‍ പൊലീസില്‍ പരാതി നല്‍കിയതിനു പിന്നാലെയാണ് അറസ്റ്റ്.
രണ്ടാമത്തെ കേസില്‍ വർക്കല സ്വദേശിയായ വിവേക് ആണ് അറസ്റ്റിലായത്. പതിനാലുകാരിയെ ഇൻസ്റ്റഗ്രാം വഴി പരിചയപ്പെട്ട് നഗ്നചിത്രങ്ങള്‍ കൈക്കലാക്കിയെന്നാണ് കേസ്. പെണ്‍കുട്ടിയുമായി സൗഹൃദം സ്ഥാപിച്ച ശേഷം വിഡിയോ കോളിലൂടെ നഗ്നദൃശ്യങ്ങള്‍ റെക്കോര്‍‍ഡ് ചെയ്യുകയായിരുന്നു. ചിത്രങ്ങളും ദൃശ്യങ്ങളും സമൂഹമാധ്യമം വഴി പ്രചരിപ്പിക്കുന്നമെന്ന് പ്രതി ഭീഷണിപ്പെടുത്തിയതായും പൊലീസ് പറഞ്ഞു. വിദേശത്തായിരുന്ന വിവേക് നാട്ടിലെത്തിയപ്പോഴാണ് ചടയമംഗലം പൊലീസ് അറസ്റ്റ് ചെയ്തത്.
