പാറ്റ്ന: സ്ത്രീ വിരുദ്ധ പരാമർശം വിവാദമായതിനെ തുടർന്ന് പിൻമാറിയ ബിജെപി നേതാവും ഭോജ്‌പുരി ഗായകനുമായ പവൻ സിംഗ് ബിഹാറിൽ മത്സരിക്കും. ബിഹാറിലെ കാരകാട്ട് മണ്ഡലത്തിൽ നിന്നും മത്സരിക്കുമെന്നാണ് പവൻ സിംഗ് അറിയിച്ചിരിക്കുന്നത്. അമ്മയാണ് ഭൂമിയേക്കാൾ വലുത്, ഇത്തവണ മത്സരിക്കുമെന്ന് താൻ അമ്മയ്ക്ക് നൽകിയ വാക്കാണ്, അത് പാലിക്കാനാണ് ലോക്‌സഭാ തെരഞ്ഞെടുപ്പിൽ മത്സരിക്കുന്നതെന്ന് പവൻ സിംഗ് സമൂഹമാധ്യമമായ എക്സിൽ കുറിച്ചു. രാഷ്ട്രീയ ലോക് മോർച്ച നേതാവ് ഉപേന്ദ്ര കുശ്വാഹയാണ് മണ്ഡലത്തിൽ എൻഡിഎ സ്ഥാനാർത്ഥി. രാജാറാം സിംഗ് കുശ്വാഹയാണ് ഇന്ത്യ സഖ്യം സ്ഥാനാർത്ഥി. പവൻ സിംഗ് പിന്മാറിയ അസൻസോളിൽ ഇന്ന് ബിജെപി സ്ഥാനാർത്ഥിയെ പ്രഖ്യാപിച്ചിരുന്നു. പിന്നാലെയാണ് പവൻ സിംഗ് സ്വന്തം നിലയിൽ സ്ഥാനാർത്ഥിത്വം പ്രഖ്യാപിച്ചത്.
