ന്യൂഡൽഹി : വിമാനത്താവളത്തിലെ തൂണ് ഇടിച്ചു തകർത്ത് സ്പൈസ് ജെറ്റ് വിമാനം. ടേക് ഓഫിനു മുൻപാണ് സംഭവം. ഇടിയുടെ ആഘാതത്തിൽ തൂണ് നിലംപൊത്തി. വിമാനത്തിനും കേടുപാടുകൾ സംഭവിച്ചു. യാത്രക്കാർക്കു പരുക്കില്ല. സ്പൈസ് ജെറ്റിന്റെ ബോയിങ് 737–800 വിമാനം രാവിലെയാണ് അപകടത്തിൽപ്പെട്ടത്. ജമ്മുവിലേക്കു പോകേണ്ട വിമാനത്തിന്റെ ഇടതു ചിറകാണ് തൂണിലിടിച്ചത്. പാസഞ്ചർ ടെർമിനലിൽനിന്ന് റൺവേയിലേക്ക് സഞ്ചരിക്കുന്നതിനിടെയാണ് അപകടം.
അപകടം ഉണ്ടായതിനെ തുടർന്ന് വിമാനം തിരികെ ബേയിലേക്കു മടങ്ങി. യാത്രക്കാരെ മറ്റൊരു വിമാനത്തിൽ ജമ്മുവിലേക്കു കൊണ്ടുപോയി. സംഭവത്തിൽ അന്വേഷണത്തിന് ഉത്തരവിട്ടതായി വിമാനത്താവള അധികൃതർ അറിയിച്ചു.
