മഹാരാജ്ഗഞ്ച്: ഒമ്പത് വയസ്സുകാരനെ തെരുവ് നായ്ക്കള്‍ കടിച്ചു കൊന്നു. ഉത്തര്‍പ്രദേശിലെ മഹാരാജ്ഗഞ്ചിലാണ് സംഭവം നടന്നത്. തിങ്കളാഴ്ചയാണ് ആദര്‍ശ് ശര്‍മ്മ എന്ന ഒമ്പത് വയസ്സുളള കുട്ടിയെ കാണാതായത്. തുടര്‍ന്ന് നടത്തിയ അന്വേഷണത്തില്‍, രാത്രി വൈകിയാണ് കടിയേറ്റ പാടുകളോടെ കുട്ടിയുടെ മൃതദേഹം കണ്ടെത്തിയത്. തിങ്കളാഴ്ച രാവിലെ 11 മണിയോടെ വീട്ടില്‍ നിന്ന് മാര്‍ക്കറ്റിലേക്ക് പോയതായിരുന്നു. തിരിച്ചെത്താത്തതിനെ തുടര്‍ന്ന് നടത്തിയ പരിശോധനയിലാണ് കുട്ടിയുടെ മൃതദേഹം കണ്ടെത്തിയത്.
നായ്ക്കൂട്ടം കുട്ടിയെ വലിച്ചിഴച്ചതായും കുട്ടിയുടെ മുഖത്തും വലതുകൈയിലും കടിയേറ്റതായും പോലീസ് പറഞ്ഞു. കുട്ടിക്ക് മാനസിക അസ്വാസ്ഥ്യമുണ്ടായിരുന്നെന്നും നായ്ക്കൂട്ടം ആക്രമിച്ച് കൊലപ്പെടുത്തുകയായിരുന്നുവെന്നുമാണ് പോലീസ് പറയുന്നത്. സ്‌കൂളിന് സമീപം മൃതദേഹം കിടക്കുന്നതായി വിവരം ലഭിച്ച ഉടന്‍ തന്നെ പോലീസ് സ്ഥലത്തെത്തിയെന്ന് ഡെപ്യൂട്ടി എസ്പി അനുജ് സിംഗ് പറഞ്ഞു.മൃതദേഹം ഏറ്റുവാങ്ങിയ ശേഷം തുടര്‍നടപടികള്‍ സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.
