ഏനാത്ത് : പ്രായപൂർത്തിയാകാത്ത വിദ്യാർഥിനിയെ, മോർഫുചെയ്ത അശ്ലീല ഫോട്ടോ കാണിച്ച് ഭീഷണിപ്പെടുത്തി പണവും സ്വർണവും തട്ടിയെന്ന കേസിൽ മൂന്ന് യുവാക്കൾ അറസ്റ്റിൽ. എറണാകുളം പാനായിക്കുളം പൊട്ടൻകുളം പി.എസ്.അലക്സ്(23), പന്തളം പൂഴിക്കാട് മെഡിക്കൽ മിഷൻ ആശുപത്രിക്കുസമീപം നിർമാല്യത്തിൽ അജിത്ത്(21), പന്തളം കുരമ്പാല പുന്തലപ്പടിക്കൽ പ്രണവ് കുമാർ (21) എന്നിവരെയാണ് ഏനാത്ത് പോലീസ് അറസ്റ്റുചെയ്തത്. നവമാധ്യമംവഴി പെൺകുട്ടിയുമായി ഒന്നാംപ്രതി അലക്സ് സൗഹൃദം സ്ഥാപിച്ചു. പെൺകുട്ടിക്ക് മറ്റൊരു സുഹൃത്തുമായുണ്ടായ പിണക്കം മാറ്റാമെന്ന് വിശ്വസിപ്പിച്ച് ഫോട്ടോ കൈക്കലാക്കുകയായിരുന്നു. തുടർന്ന് ഫോട്ടോ മോർഫുചെയ്ത് അശ്ലീല ഫോട്ടോയാക്കി അത് പ്രചരിപ്പിക്കുമെന്ന് പറഞ്ഞ് പെൺകുട്ടിയെ ഭീഷണിപ്പെടുത്തി പണം ആവശ്യപ്പെട്ടു.
ഒരുലക്ഷംരൂപയാണ് ആദ്യം ആവശ്യപ്പെട്ടത്. പണമില്ലാത്തതിനാൽ പെൺകുട്ടി ആദ്യം കൊലുസ് നൽകി. പിന്നീട് മറ്റ് സ്വർണം പണയംവെച്ച് 70,000 രൂപകൂടി നൽകി. രണ്ടുംമൂന്നും പ്രതികളാണ് സ്വർണവും പണവും പെൺകുട്ടിയിൽനിന്ന് കൈപ്പറ്റിയിരുന്നതെന്ന് പോലീസ് പറഞ്ഞു. സംഭവം വീട്ടിൽ അറിയാതിരിക്കാൻ ഗോൾഡ് കവറിങ് കൊലുസുവാങ്ങി പെൺകുട്ടിക്ക് നൽകിയിരുന്നു.
