തിരുവനന്തപുരം : തനിക്കു ലഭിച്ച ജോലി സംബന്ധിച്ച വിവാദങ്ങൾക്കു പിന്നിലും മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം.ശിവശങ്കർ ആണെന്ന ആരോപണവുമായി സ്വർണക്കടത്ത് കേസ് പ്രതി സ്വപ്ന സുരേഷ്. ‘ഇപ്പോഴത്തെ എല്ലാ ആരോപണങ്ങൾക്കു പിന്നിലും എന്തൊക്കെയോ ഉദ്ദേശ്യമുണ്ട്. എം.ശിവശങ്കറിനോട് എനിക്ക് ഒന്നേ പറയാനുള്ളൂ, നിങ്ങൾക്ക് എന്നെ കൊല്ലാനുള്ള എല്ലാ അവകാശവുമുണ്ട്. എനിക്കും കുട്ടികൾക്കും അമ്മയ്ക്കും കുറച്ചു വിഷം നൽകി കൊല്ലുക. നിങ്ങൾ നൽകുന്ന വിഷം കഴിച്ച് മരിക്കാൻ ഞങ്ങൾക്കു സന്തോഷമേയുള്ളൂ. അല്ലാതെ ഇങ്ങനെ ഉപദ്രവിക്കരുത്’– സ്വപ്ന പറഞ്ഞു.
ജോലി തന്ന എച്ച്ആർഡിഎസിന് രാഷ്ട്രീയ ബന്ധമുണ്ടെന്ന ആരോപണം സ്വപ്ന തള്ളി. അവർ നൽകിയ ഓഫർ താൻ സ്വീകരിക്കുകയായിരുന്നു. അവർക്ക് രാഷ്ട്രീയ ബന്ധമുണ്ടോയെന്നൊന്നും അറിയില്ല. ജീവിക്കാൻ നിവൃത്തിയില്ലാതെ നിൽക്കുന്ന തനിക്ക് ജോലി തിരഞ്ഞെടുക്കാൻ ഒരുപാട് അവസരങ്ങളൊന്നുമില്ല. ജീവിക്കാൻ അനുവദിക്കണമെന്ന് അപേക്ഷിക്കുകയാണ് എല്ലാവരോടും. ജോലിയിൽ മാറ്റമൊന്നുമില്ലെന്നു കമ്പനി അറിയിച്ചതായും സ്വപ്ന പറഞ്ഞു.
