ഹൈദരാബാദ്: വിവാഹം കഴിഞ്ഞ് ഒരു മാസത്തിനുശേഷം ഭർത്താവിനെ കൊലപ്പെടുത്തിയ നവവധുവും കാമുകനും ഉൾപ്പെടെ ആറു പേർ അറസ്റ്റിൽ. തെലങ്കാനയിലെ സിദ്ധിപ്പേട്ടിലാണ് സംഭവം. ഏപ്രിൽ 28നു നടന്ന കൊലപാതകം പത്തു ദിവത്തിനു ശേഷമാണ് പുറംലോകമറിയുന്നത്. സിദ്ധിപ്പേട്ട് സ്വദേശി കെ.ചന്ദ്രശേഖർ (24) കൊല്ലപ്പെട്ട കേസിൽ ഭാര്യ ശ്യാമള (19), കാമുകൻ ശിവകുമാർ (20), ഇയാളുടെ സുഹൃത്തുക്കളായ രാകേഷ്, രഞ്ജിത്ത്, ബന്ധുക്കളായ സായ് കൃഷ്ണ, ഭാർഗവ് എന്നിവരെയാണ് പൊലീസ് അറസ്റ്റ് ചെയ്തത്.
ചന്ദ്രശേഖർ ഹൃദയാഘാതം മൂലം മരിച്ചെന്നാണ് ശ്യാമള ബന്ധുക്കളോട് ഉൾപ്പെടെ പറഞ്ഞിരുന്നത്. സംശയം തോന്നിയ ചന്ദ്രശേഖറിന്റെ മാതാവ് നൽകിയ പരാതിയുടെ അടിസ്ഥാനത്തിൽ പൊലീസ് നടത്തിയ അന്വേഷണത്തിലാണ് സത്യം പുറത്തുവന്നത്. ഭർത്താവിനെ താനും കാമുകനും കൂട്ടാളികളും ചേർന്നു കൊലപ്പെടുത്തിയതാണെന്നു ശ്യാമള പൊലീസിനോടു സമ്മതിച്ചു.
കഴിഞ്ഞ മൂന്നു വർഷമായി ശ്യാമളയും ശിവകുമാറും തമ്മിൽ പ്രണയത്തിലായിരുന്നെന്നു പൊലീസ് പറഞ്ഞു. എന്നാൽ ബന്ധുക്കളുടെ നിർബന്ധത്തെത്തുടർന്ന് ഈ വർഷം മാർച്ച 23ന് ചന്ദ്രശേഖറിനെ വിവാഹം ചെയ്തു. ഇതിനുശേഷവും ശിവകുമാറുമായുള്ള ബന്ധം തുടർന്ന ശ്യാമള, ഭർത്താവിനെ ഒഴിവാക്കാൻ പദ്ധതികൾ ആസൂത്രണം ചെയ്തു. ഏപ്രിൽ 19ന് ഭക്ഷണത്തിൽ വിഷം ചേർത്തു നൽകി കൊലപ്പെടുത്താൻ ശ്രമിച്ചെങ്കിലും നടന്നില്ല. ഭക്ഷ്യവിഷബാധയാണെന്ന സംശയത്തിൽ വിദഗ്ധ ചികിത്സ തേടിയ ചന്ദ്രശേഖർ മരണത്തിൽനിന്നു രക്ഷപ്പെട്ടു.
ആദ്യ ശ്രമം പരാജയപ്പെട്ടതിനെ തുടർന്ന് ഏപ്രിൽ 28ന് മറ്റൊരു പദ്ധതിയിട്ടു. ഇതിന്റെ ഭാഗമായി തന്നെയും കൂട്ടി ക്ഷേത്രത്തിൽ പോകാൻ ചന്ദ്രശേഖറിനോട് ശ്യാമള ആവശ്യപ്പെട്ടു. വഴിമധ്യേ മുൻകൂട്ടി നിശ്ചയിച്ച പ്രകാരം ഇവർ സഞ്ചരിച്ച ബൈക്ക്, ശിവകുമാറും കൂട്ടാളികളും കാറിലെത്തി തടഞ്ഞു. ചന്ദ്രശേഖറിനെ കായികമായി കീഴടക്കിയശേഷം ശ്യാമള കഴുത്തുഞെരിച്ചു കൊലപ്പെടുത്തുകയായിരുന്നെന്നു പൊലീസ് പറഞ്ഞു. അറസ്റ്റിലായ ആറു പേരെയും കോടതി ജുഡീഷ്യൽ കസ്റ്റഡിയിൽ വിട്ടു.
