മുംബൈ: സർവ്വർ തകരാറിനെ തുടർന്ന് തപാൽ വകുപ്പിന്റെ വിവിധ സേവനങ്ങൾക്ക് കഴിഞ്ഞ മൂന്ന് ദിവസമായി തടസ്സം നേരിടുകയാണ്. മണി ഓര്‍ഡര്‍ അടക്കമുള്ള സേവനങ്ങളാണ് തടസ്സപ്പെട്ടത്. അതേസമയം കത്തുകള്‍, സ്പീഡ് പോസ്റ്റ്, രജിസ്ട്രേഡ് തപാൽ എന്നിവയ്ക്ക് തടസ്സമില്ല. തപാൽ വകുപ്പ് നവി മുംബൈയിലെ റിലയൻസിന്റെ ഉടമസ്ഥതയിലുള്ള സർവർ ആണ് ഉപയോഗിച്ചുകൊണ്ടിരുന്നത്. റിലയൻസുമായുള്ള കരാർ അവസാനിച്ചതിന് പിന്നാലെ ഈ സെർവറിൽ നിന്ന് ഡാറ്റകൾ സുരക്ഷിത കേന്ദ്രത്തിലേക്ക് മാറ്റുന്നതിനിടയിൽ ഉണ്ടായ സാങ്കേതിക പ്രശ്നങ്ങളാണ് തപാൽ സർവീസുകളെ ബാധിച്ചത്. മൈസൂരുവിലെ ഡിസാസ്റ്റർ റിക്കവറി സെൻ്ററിലെ സർവർലേക്കായിരുന്നു ഡാറ്റകൾ മാറ്റാൻ ശ്രമിച്ചത്. പ്രശ്നം പരിഹരിക്കാനുള്ള ശ്രമം തുടരുകയാണെന്നാണ് തപാൽ വകുപ്പിൽ നിന്ന് ലഭിക്കുന്ന വിവരം.
