ദില്ലി: കെടിയു വിസി നിയമനം റദ്ദാക്കിയ സുപ്രീം കോടതി വിധി വായിച്ച് സർക്കാറിന് മുന്നറിയിപ്പുമായി ഗവർണ്ണർ ആരിഫ് മുഹമ്മദ് ഖാന്‍. വി സി നിയമനം നടത്താന്‍ ആര്‍ക്കാണ് അര്‍ഹതയെന്നും ആര്‍ക്കാണ് അര്‍ഹതയില്ലാത്തതെന്നും സുപ്രീം കോടതി വ്യക്തമായി പറഞ്ഞിട്ടുണ്ടെന്ന് ഗവര്‍ണര്‍ പറഞ്ഞു. യുജിസി ചട്ടങ്ങളുടെ ലംഘനമെന്ന് വ്യക്തമാക്കി ഡോ. എപിജെ അബ്ദുൽ കലാം സാങ്കേതിക സർവകലാശാല വൈസ് ചാൻസലര്‍ നിയമനം സുപ്രീം കോടതി ഇന്നലെ റദ്ദാക്കിയിരുന്നു. യുജിസി ചട്ടങ്ങൾ പാലിച്ചല്ല നിയമനം എന്ന ഹർജിക്കാരൻ ഡോ. ശ്രീജിത്ത് പി എസിന്‍റെ വാദങ്ങൾ അംഗീകരിച്ചായിരുന്നു കോടതി വിധി.
വൈസ് ചാന്‍സലറെ നിയമിക്കുന്നതുമായി ബന്ധപ്പെട്ട ചട്ടങ്ങൾ ലംഘിച്ചെന്നായിരുന്നു ഹർജിക്കാരൻ്റെ വാദം. വി സി നിയമനത്തിന് പാനല്‍ നല്‍കുന്നതിന് പകരം ഡോ. രാജശ്രീയുടെ പേര് മാത്രമാണ് ചാന്‍സലറായ ഗവര്‍ണര്‍ക്ക് കൈമാറിയത്. കൂടാതെ സെർച്ച് കമ്മറ്റിയിൽ വിദ്യാഭ്യാസ മേഖലയിലെ പ്രധാന വ്യക്തികൾ ഉണ്ടാകണമെന്ന യു ജി സി ചട്ടം മറികടന്ന് ചീഫ് സെക്രട്ടറിയെ സെര്‍ച്ച് കമ്മിറ്റിയില്‍ അംഗമാക്കി. ചീഫ് സെക്രട്ടറിക്ക് വിദ്യാഭ്യാസ മേഖലയുമായി നേരിട്ട ബന്ധമില്ലെന്നും ഹർജിക്കാരൻ വാദിച്ചു.
യു ജി സി ചെര്‍മാന്‍റെ നോമിനിക്ക് പകരം എഐസിടിഇ നോമിനിയെ കമ്മിറ്റിയില്‍ ഉള്‍പ്പെടുത്തിയത് ചട്ടലംഘനമാണെന്നും ഹർജിയിൽ പറഞ്ഞിരുന്നു. നിയമനം 2015 – ലെ സാങ്കേതിക സര്‍വ്വകലാശാല നിയമത്തിലെ നടപടി ക്രമങ്ങൾ പാലിച്ചെന്നായിരുന്നു സംസ്ഥാന സര്‍ക്കാരിന്‍റെ വാദം. 2013 – ലെ യു ജി സി ചട്ടങ്ങള്‍ പ്രകാരം സംസ്ഥാന നിയമത്തിന്‍റെ അടിസ്ഥാനത്തിലും നിയമനം നടത്താമെന്ന സർക്കാരിന്‍റെ വാദം തള്ളിയാണ് കോടതി ഉത്തരവ്. 2019 ലാണ് രാജശ്രീ എം എസിനെ വൈസ് ചാൻസലറായി നിയമിച്ചത്. കാലാവധി തീരാൻ ആറ് മാസം ബാക്കി നിൽക്കയാണ് കോടതി ഉത്തരവിലൂടെ വിസി പുറത്തുപോകുന്നത്.
