കഴിഞ്ഞ കുറച്ച് വർഷങ്ങളായി ലോകമെമ്പാടുമുള്ള ദശലക്ഷക്കണക്കിന് ആളുകളെ ഉയർന്ന രക്തസമ്മർദ്ദം അലട്ടുന്നതായി റിപ്പോർട്ടുകൾ പറയുന്നു. ഉയർന്ന രക്തസമ്മർദ്ദം ചികിത്സിച്ചില്ലെങ്കിൽ ഹൃദയസ്തംഭനത്തിനും വൃക്ക തകരാറും ഉണ്ടാകാനുള്ള സാധ്യത കൂടുതലാണെന്ന് പഠനം.
വ്യായാമമില്ലായ്മയും തെറ്റായ ഭക്ഷണരീതിയുമൊക്കെയാണ് ഉയർന്ന രക്തസമ്മർദ്ദത്തിനുള്ള പ്രധാനപ്പെട്ട കാരണങ്ങൾ. ഹൈപ്പർടെൻഷൻ ഉള്ള 5 പേരിൽ 4 പേർക്കും വേണ്ടത്ര ചികിത്സ ലഭിക്കുന്നില്ലെന്ന് റിപ്പോർട്ടിൽ പറയുന്നു.
ആഗോളതലത്തിൽതന്നെ ലക്ഷണക്കണക്കിനുപേരുടെ മരണത്തിന് കാരണക്കാരനാകുന്ന നിശബ്ദകൊലയാളിയാണ് രക്തസമ്മർദ്ദം. രക്തസമ്മർദത്തിന്റെ ഏറ്റക്കുറച്ചിലുകളും പക്ഷാഘാതവും ഹൃദയാഘാതവും തമ്മിലുള്ള വൃക്കപരാജയവും തമ്മിലുള്ള ബന്ധത്തേക്കുറിച്ചാണ് ലോകാരോഗ്യസംഘടനയുടെ റിപ്പോർട്ടിൽ പറയുന്നത്.
ഇന്ത്യയിലെ ആകെ മരണങ്ങളിൽ 10.8 ശതമാനവും ഹൈപ്പർടെൻഷൻ മൂലമാണെന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന്റെ (ഐസിഎംആർ) കണക്കുകൾ ചൂണ്ടിക്കാട്ടുന്നു.
‘ ലളിതവും ചെലവുകുറഞ്ഞതുമായ മരുന്നുകൾ ഉപയോഗിച്ച് രക്താതിമർദ്ദം ഫലപ്രദമായി നിയന്ത്രിക്കാനാകും. എന്നിട്ടും ഹൈപ്പർടെൻഷനുള്ള അഞ്ചിൽ ഒരാൾക്ക് മാത്രമേ ഇത് നിയന്ത്രിക്കാനാകൂ…’ – ഡബ്ല്യുഎച്ച്ഒ ഡയറക്ടർ ജനറൽ ഡോ ടെഡ്രോസ് അദാനോം ഗെബ്രിയേസസ് പറഞ്ഞു.
ഉയർന്ന രക്തസമ്മർദ്ദത്തിന്റെ ലക്ഷണങ്ങൾ?
രക്തധമനികളുടെ ഭിത്തികളിൽ രക്തം ചെലുത്തുന്ന മർദമാണ് രക്തസമ്മർദ്ദം. രക്തസമ്മർദ്ദം മൂലം ഹൃദയാഘാതം, സ്‌ട്രോക്ക് പോലെയുള്ള നിരവധി പ്രശ്നങ്ങളാണ് പലരേയും പിടിപെടുന്നത്.
ലക്ഷണങ്ങൾ…
- ഒന്ന്…
- ഉയർന്ന രക്തസമ്മർദ്ദമുള്ള ഭൂരിഭാഗം ആളുകൾക്കും തലവേദന വരാനുള്ള സാധ്യത കൂടുതലാണ്. അതിരാവിലെ തന്നെ തലവേദന അനുഭവപ്പെടുന്നത് ചിലപ്പോൾ ഉയർന്ന രക്തസമ്മർദ്ദത്തിന്റെ ലക്ഷണമാകാം.
- രണ്ട്…
- ഉയർന്ന രക്തസമ്മർദ്ദം മൂലം കാലുകളിലേയ്ക്കും കൈകളിലേയ്ക്കുമുള്ള സുഗമമായ രക്തപ്രവാഹം തടസപ്പെടാനുള്ള സാധ്യത ഏറെയാണ്. നടക്കുമ്പോൾ കാലുവേദന, തണുത്ത കൈകാലുകൾ തുടങ്ങിയ ലക്ഷണങ്ങൾ ഇതുമൂലം ഉണ്ടാകാം.
- മൂന്ന്…
- മൂക്കിൽ നിന്ന് രക്തസ്രാവം ഉണ്ടാകുന്നത് ഉയർന്ന രക്തസമ്മർദ്ദത്തിന്റെ മറ്റൊരു ലക്ഷണമായാണ് വിദഗ്ധർ പറയുന്നത്.
- നാല്…
- കാഴ്ച മങ്ങലും ഉയർന്ന രക്തസമ്മർദ്ദത്തിൻറെ ലക്ഷണമായി കാണപ്പെടാറുണ്ട്.
