കൊച്ചി: വിമാനത്തിന്റെ ശുചി മുറിയിൽ ഒളിപ്പിച്ച് കടത്താൻ ശ്രമിച്ച മൂന്നര കിലോ സ്വർണം നെടുമ്പാശ്ശേരി വിമാനത്താവളത്തിൽ പിടികൂടി. മാലിദ്വീപിൽ നിന്നെത്തിയ ഇൻഡിഗോ വിമാനത്തിന്റെ ശുചി മുറിയിൽ നിന്നാണ് ഡയറക്ടറേറ്റ് ഓഫ് റെവന്യു ഇന്റലിജൻസ് സ്വർണം പിടികൂടിയത്. മസ്കറ്റിൽ നിന്നും മാലി വഴി നെടുന്പാശേരിയിൽ എത്തിയ വിമാനം പിന്നീട് ഹൈദരാബാദിലേക്ക് പോകേണ്ടതായിരുന്നു. മസ്കറ്റിൽ നിന്നുമെത്തിയ ആരെങ്കിലുമാകാം സ്വർണം കൊണ്ടുവന്നതെന്നാണ് സംശയം. ഇത് ശുചി മുറിയിലൊളിപ്പിച്ചത് നെടുമ്പാശേരിയിൽ നിന്നും കയറിയ ആരെങ്കിലും വഴി ഹൈദരാബാദിലിറക്കാൻ ആയിരിന്നുരിക്കാം പദ്ധതി എന്നാണ് നിഗമനം.
