ഷാര്‍ജ: യുഎഇയിലെ ഷാര്‍ജയില്‍ വാഹനാപകടത്തില്‍ മൂന്ന് മരണം. ഒരാള്‍ക്ക് പരിക്കേറ്റു. എമിറേറ്റ്‌സ് റോഡില്‍ ശനിയാഴ്ചയാണ് അപകടമുണ്ടായതെന്ന് ഷാര്‍ജ പൊലീസ് അറിയിച്ചു
അമിതവേഗമാണ് അപകടത്തിന് കാരണമായതെന്ന് പൊലീസ് പറയുന്നത്. യുഎഇ സ്വദേശികളാണ് അപകടത്തില്‍പ്പെട്ടത്. എമിറേറ്റ്‌സ് റോഡില്‍ അല്‍ സുബൈര്‍ ടണലില്‍ നിന്ന് ബ്രിഡ്ജ് നമ്പര്‍ 7ലേക്ക് പോകുകയായിരുന്ന വാഹനം റോഡിന്റെ ഇരുവശവും വേര്‍തിരിക്കുന്ന കോണ്‍ക്രീറ്റ് ബാരിയറിലും ലൈറ്റ് തൂണിലും ഇടിച്ചാണ് അപകടമുണ്ടായത്.
രാത്രി 7.17നാണ് അപകടവിവരം ഷാര്‍ജ പൊലീസ് സെന്‍ട്രല്‍ ഓപ്പറേഷന്‍സ് റൂമില്‍ ലഭിച്ചത്. ഉടന്‍ തന്നെ പ്രത്യേക പൊലീസ് സംഘവും ആംബുലന്‍സും സ്ഥലത്തെത്തി. പരിക്കേറ്റയാളെ ആശുപത്രിയില്‍ പ്രവേശിപ്പിച്ചിരിക്കുകയാണ്. ഗതാഗത നിയമങ്ങള്‍ പാലിക്കണമെന്നും വേഗത കുറക്കണമെന്നും ഷാര്‍ജ പൊലീസ് ജനറല്‍ കമാന്‍ഡ് ഡ്രൈവര്‍മാരോട് അഭ്യര്‍ത്ഥിച്ചു.
