ഷില്ലോങ്: ഭാരത് ജോഡോ യാത്രക്ക് പിന്നാലെ വിവിധ സംസ്ഥാനങ്ങളിലെ തെരഞ്ഞെടുപ്പ് പ്രചാരണ പരിപാടികളിൽ സജീവമായി കോൺഗ്രസ് നേതാവും എം.പിയുമായ രാഹുൽ ഗാന്ധി. പ്രചാരണത്തിന്റെ ഭാഗമായി രാഹുൽ ഗാന്ധി മേഘാലയയിലെ കോൺഗ്രസ് തെരഞ്ഞെടുപ്പ് റാലിയിൽ പ്രസംഗിച്ചു.
ബി.ജെ.പി അധികാരത്തിലെത്തുന്നത് ഉറപ്പാക്കാനാണ് മേഘാലയയിൽ തൃണമൂൽ കോൺഗ്രസ് മത്സരിക്കുന്നതെന്ന് അദ്ദേഹം ആരോപിച്ചു. ഗോവയിലും സമാനമായ രീതിയിൽ തൃണമൂൽ കോൺഗ്രസ് മത്സരിച്ചിരുന്നു. ഈ തന്ത്രം ബി.ജെ.പിയെ സഹായിക്കുകയും ചെയ്തു.
നിങ്ങൾക്ക് തൃണമൂലിന്റെ ചരിത്രമറിയാം. അക്രമവും അഴിമതിയുമാണ് ഇപ്പോൾ ബംഗാളിൽ നടക്കുന്നത്. ഈ സംസ്കാരത്തെ കുറിച്ച് നിങ്ങൾ അറിവുണ്ടാകുമെന്നാണ് പ്രതീക്ഷ. ഗോവയിൽ അവർ വലിയ തുക ചെലവഴിച്ചത് ബി.ജെ.പിയെ സഹായിക്കാനാണ്. മേഘാലയിലും ഇതേ തന്ത്രമാണ് പയറ്റുന്നതെന്ന് അദ്ദേഹം പറഞ്ഞു. എല്ലാം അറിയാമെന്ന അഹങ്കാരത്തോടെ ആരെയും ബഹുമാനിക്കാതെയാണ് ബി.ജെ.പി മുന്നോട്ട് പോകുന്നത്. മേഘാലയയുടെ ഭാഷയേയും സംസ്കാരത്തേയും തകർക്കാൻ ബി.ജെ.പിയെ അനുവദിക്കില്ലെന്നും അദ്ദേഹം പറഞ്ഞു.
