ന്യൂഡൽഹി> തെരഞ്ഞെടുപ്പ് പൂർണമായും അട്ടിമറിക്കപ്പെട്ട ത്രിപുരയിലെ ബോക്സാനഗർ, ധാൻപ്പുർ മണ്ഡലങ്ങളിലെ ഫലപ്രഖ്യാപനം അസാധുവാക്കി കർക്കശമായ നിരീക്ഷണത്തിൽ വീണ്ടും തെരഞ്ഞെടുപ്പ് നടത്തണമെന്ന് സിപിഐഎം പൊളിറ്റ്ബ്യൂറോ ആവശ്യപ്പെട്ടു. തെരഞ്ഞെടുപ്പ് അസാധുവാക്കി റീപോളിങ് നടത്തണമെന്ന സിപിഐഎമ്മിന്റെ ആവശ്യത്തെ ശരിവെയ്ക്കുന്നതാണ് ഇപ്പോൾ പുറത്തുവന്ന തെരഞ്ഞെടുപ്പ് ഫലം. ബോക്സാനഗറിൽ ബിജെപി 89 ശതമാനവും ധാൻപ്പുരിൽ 71 ശതമാനവും വോട്ടുനേടി. ത്രിപുരയുടെ തെരഞ്ഞെടുപ്പ് ചരിത്രത്തിൽ ഇത്ര ഏകപക്ഷീയമായ ഒരു ഫലം ഇതാദ്യമായാണ്.
കഴിഞ്ഞ ഫെബ്രുവരിയിൽ നടന്ന തെരഞ്ഞെടുപ്പിൽ സിപിഐഎം ജയിച്ച മണ്ഡലമായ ബോക്സാനഗറിൽ വ്യാപകമായ ക്രമക്കേട് നടത്താതെ 89 ശതമാനം വോട്ട് ബിജെപിക്ക് കിട്ടുകയെന്നത് അസാധ്യമാണ്. ഭരണസംവിധാനങ്ങളുടെയും പൊലീസിന്റെയും സഹായത്തോടെ പൂർണമായും അട്ടിമറിക്കപ്പെട്ട രണ്ട് മണ്ഡലങ്ങളിലെയും തെരഞ്ഞെടുപ്പ് പ്രഹസനമാണ്. തെരഞ്ഞെടുപ്പ് അസാധുവാക്കി പുതിയ തെരഞ്ഞെടുപ്പിന് കമീഷൻ ഉത്തരവിടണം–- പിബി ആവശ്യപ്പെട്ടു.
