മുംബൈ: മുംബൈ തെരുവിലൂടെ സ്‌കൂട്ടറില്‍ ചുറ്റി ഇന്ത്യൻ താരം വിരാട് കോലിയും ഭാര്യയും ബോളിവുഡ് താരവുമായ അനുഷ്‌ക ശർമയും. ഇരുവരും സ്കൂട്ടറിൽ മുംബൈയിലെ തെരുവിലൂടെ കറങ്ങുന്ന ചിത്രങ്ങൾ സമൂഹമാധ്യമങ്ങളിൽ അതിവേഗം വൈറലായി. പച്ച നിറത്തിലുള്ള ഷർട്ടും കറുത്ത പാന്റുമാണ് കോലിയുടെ വേഷം. കറുത്ത ടി ഷര്‍ട്ടും പാന്റുമാണ് അനുഷ്‌ക അണിഞ്ഞിരിക്കുന്നത്. മുംബൈയിലെ മഡ് ഐലൻഡിൽ പരസ്യ ചിത്രീകരണം കഴിഞ്ഞ് മടങ്ങുംവഴിയാണ് താരങ്ങൾ സ്കൂട്ടറിൽ യാത്ര ചെയ്‌തത്.
എഷ്യാകപ്പിനുള്ള ഒരുക്കത്തിലാണ് വിരാട് കോലി. വെസ്റ്റ് ഇന്‍ഡീസ് പര്യടനത്തില്‍ നിന്നും പിന്നാലെ നടന്ന സിംബാബ്‍വെ പര്യടനത്തിൽ നിന്നും കോലിക്ക് വിശ്രമം അനുവദിച്ചിരുന്നു. ഈ മാസം 28 ന് പാക്കിസ്ഥാനെതിരെയാണ് എഷ്യൻകപ്പിൽ ഇന്ത്യയുടെ ആദ്യ മത്സരം. ചെറിയ ഇടവേള ഫോമിലേക്ക് തിരികെയെത്താൻ കോലിയെ സഹായിക്കുമെന്നും പാക്കിസ്ഥാനെതിരെ മിന്നും ഫോം കോലി പുറത്തെടുക്കുമെന്നു പ്രതീക്ഷിക്കുന്നതായും ആരാധകർ സമൂഹമാധ്യമത്തിലൂടെ അഭിപ്രായപ്പെടുന്നു.
