പന്തളം: എംഡിഎംഎ യുമായി രണ്ടുകുട്ടികള്‍ പിടിയില്‍. കളിക്കളങ്ങളില്‍ ഒത്തുകൂടുന്ന കുട്ടികളെ കേന്ദ്രീകരിച്ച് രാസലഹരികളുടെ കൈമാറ്റവും വില്‍പനയും നടക്കുന്നുണ്ടെന്ന രഹസ്യവിവരത്തിന്റെ അടിസ്ഥാനത്തില്‍ നടത്തിയ നിരീക്ഷണത്തിലാണ് കുട്ടികള്‍ പോലീസ് പിടിയിലായത്. പ്ലസ് വണ്‍, പ്ലസ് ടു ക്ലാസ്സുകളില്‍ പഠിക്കുന്ന കുട്ടികളാണ് ഇന്ന് പന്തളത്ത് ഡാന്‍സാഫ് സംഘത്തിന്റെയും പന്തളം പോലീസിന്റെയും സംയുക്ത നീക്കത്തില്‍ കുടുങ്ങിയത്. ഇവരില്‍ നിന്നും ഒരു ഗ്രാം എം ഡി എം എ പിടിച്ചെടുത്തു.
കളിക്കളങ്ങള്‍ കേന്ദ്രീകരിച്ച് കര്‍ശനനിരീക്ഷണം തുടരാന്‍ ജില്ലാ പോലീസ് മേധാവി പോലീസിന് നിര്‍ദേശം നല്‍കിയിരുന്നു. കുളനട പെട്രോള്‍ പമ്പിനടുത്തുനിന്നാണ് രാസലഹരിയുമായി കുട്ടികള്‍ പോലീസ് വലയിലായത്. ഇത്തരം ലഹരിവസ്തുക്കളുടെ ഉപയോഗം കുട്ടികളില്‍ വ്യാപകമാകുന്നത് ശ്രദ്ധയില്‍പ്പെട്ടതിനെതുടര്‍ന്നാണ് പോലീസ് നടപടി കടുപ്പിച്ചത്.
