റിയാദ്: സൗദി അറേബ്യയില്‍ ഉണ്ടായ വാഹനാപകടത്തില്‍ രണ്ട് ഗര്‍ഭിണികള്‍ മരിച്ചു. തെക്ക്-പടിഞ്ഞാറന്‍ സൗദിയില്‍ അസീര്‍, നജ് റാന്‍ മേഖലകളെ തമ്മില്‍ ബന്ധിപ്പിക്കുന്ന റോഡിലാണ് അപകടം ഉണ്ടായത്. രണ്ട് സ്‌കൂള്‍ അധ്യാപികമാരാണ് മരിച്ചതെന്ന് പ്രാദേശിക മാധ്യമത്തെ ഉദ്ധരിച്ച് റിപ്പോര്‍ട്ട് ചെയ്തു.
ചൊവ്വാഴ്ചയാണ് അപകടം ഉണ്ടായത്. അപകടത്തില്‍ മറ്റ് നാലു പേര്‍ക്ക് പരിക്കേറ്റു. സ്‌കൂളില്‍ നിന്ന് മടങ്ങുന്നതിനിടെയാണ് അധ്യാപികമാര്‍ അപകടത്തില്‍പ്പെട്ടത്. മരണപ്പെട്ടവരില്‍ ഒരു അധ്യാപിക ഒമ്പതു മാസം ഗര്‍ഭിണിയായിരുന്നു. മറ്റൊരാള്‍ ആറുമാസം ഗര്‍ഭിണിയുമായിരുന്നെന്ന് റിപ്പോര്‍ട്ടില്‍ പറയുന്നു. റെഡ് ക്രസന്റ് സംഘം സ്ഥലത്തെത്തിയിരുന്നു. പരിക്കേറ്റവരില്‍ ആരുടെയും നില ഗുരുതരമല്ല. പരിക്കേറ്റവരെ സമീപത്തെ ആശുപത്രിയിലേക്ക് മാറ്റി. അപകടം നടന്ന സ്ഥലത്ത് കാര്‍ തലകീഴായി മറിഞ്ഞത് കാണാം. എന്നാല്‍ എങ്ങനെയാണ് കൂട്ടിയിടി ഉണ്ടായതെന്ന് വ്യക്തമല്ല.
