കീവ് : റഷ്യയുടെ അധിനിവേശം അതിന്റെ മൂർധന്യത്തിലെത്തിനിൽക്കെ ജനങ്ങളോട് രാജ്യത്തെ സംരക്ഷിക്കാൻ ആയുധം കയ്യിലെടുക്കാൻ ആഹ്വാനം ചെയ്ത് യുക്രൈൻ പ്രസിഡന്റ് വൊളോദിമിർ സെലെൻസ്കി. റഷ്യൻ സൈന്യം യുക്രൈൻ തലസ്ഥാനമായ കീവ് ലക്ഷ്യമാക്കി നീങ്ങിക്കൊണ്ടിരിക്കെ രാജ്യത്തിനായി തെരുവിൽ പോരാടാൻ തയ്യാറുള്ള ഏതൊരാൾക്കും യുക്രൈൻ സർക്കാർ ആയുധം നൽകുമെന്നും വൊളോദിമിർ സെലെൻസ്കി ട്വിറ്ററിലൂടെ വ്യക്തമാക്കി. “രാജ്യത്തെ പ്രതിരോധിക്കാൻ തയ്യാറുള്ള ഏതൊരാൾക്കും ഞങ്ങൾ ആയുധങ്ങൾ നൽകും. പിന്തുണയ്ക്കാൻ തയ്യാറെടുക്കുക”- സെലെൻസ്കി ട്വീറ്റ് ചെയ്തു. സന്നദ്ധരായ ജനങ്ങൾക്ക് ആയുധം നൽകുമെന്നും അതിന് ആവശ്യമായ നിയമപരമായ ഉത്തരവുകൾ പുറപ്പെടുവിക്കുമെന്നും സെലെൻസ്കി മറ്റൊരു ട്വീറ്റിൽ വ്യക്തമാക്കി.
പതിനെട്ടിനും അറുപതിനുമിടയിൽ പ്രായമുള്ള പുരുഷൻമാർ രാജ്യം വിടരുതെന്നും യുക്രൈൻ പുറത്തിറക്കിയ ഉത്തരവിൽ പറയുന്നു. യുദ്ധം രൂക്ഷമായ യുക്രൈൻ നഗരങ്ങളിൽ നിന്ന് കൂട്ട പലായനം നടക്കുകയാണ്. ഒരുലക്ഷം പേർ പലായനം ചെയ്തതായാണ് അനൗദ്യോഗിക റിപ്പോർട്ടുകൾ പറയുന്നത്. നേരത്തെ റഷ്യയുടെ എല്ലാ സഖ്യ രാജ്യങ്ങളുമായുമുള്ള എല്ലാ ബന്ധങ്ങളും വിച്ഛേദിക്കാൻ യുക്രൈൻ തീരുമാനിച്ചിരുന്നു. നിലവിൽ യുക്രൈന്റെ എല്ലാ പ്രധാന നഗരങ്ങളും കടുത്ത റഷ്യൻ ആക്രമണം നേരിടുകയാണ്. കീവ് ലക്ഷമാക്കി റഷ്യൻ സൈന്യം നീങ്ങുന്നതായാണ് വിവരം. ഏത് സമയവും യുക്രൈൻ തലസ്ഥാനം റഷ്യ കീഴടക്കിയേക്കുമെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. നിലവിൽ 137 ആളുകൾ കൊല്ലപ്പെട്ടതായി യുക്രൈൻ ഔദ്യോഗികമായി സ്ഥിരീകരിച്ച് കഴിഞ്ഞു.
യുക്രൈൻ നാറ്റോയിലെ 27 രാജ്യങ്ങളോടും ഉൾപ്പടെ സഹായം തേടിയിരുന്നുവെന്നും എന്നാൽ ആരും സഹായിക്കാൻ തയ്യാറായില്ലെന്നും സെലെൻസ്കി വ്യക്തമാക്കിയിരുന്നു. അമേരിക്ക ഉൾപ്പടെയുള്ള രാജ്യങ്ങൾ സൈന്യത്തെ അയക്കില്ലെന്ന് വ്യക്തമാക്കിയതോടെയാണ് ജനങ്ങൾക്ക് ആയുധം നൽകുന്നതുൾപ്പടെ അവസാന പ്രതിരോധങ്ങളിലേക്ക് നീങ്ങാൻ യുക്രൈനെ പ്രേരിപ്പിച്ചത്. സഖ്യകക്ഷികൾക്കെല്ലാം ഭയമാണെന്നും റഷ്യയുടെ ലക്ഷ്യം താനാണെന്നുമാണ് സെലെൻസ്കി രാജ്യത്തെ അഭിസംബോധന ചെയ്ത് പറഞ്ഞത്. റഷ്യൻ അട്ടിമറി സംഘങ്ങൾ കീവിൽ പ്രവേശിച്ചുവെന്നും യുക്രൈൻ പ്രസിഡന്റ് തന്റെ ജനതയ്ക്ക് മുന്നറിയിപ്പ് നൽകി.
