പട്ന : ഔറംഗബാദ് ജില്ലയിലെ മാവോയിസ്റ്റ് ഒളിത്താവളത്തിൽ നിന്നു വൻ ആയുധശേഖരം പിടികൂടി. ചക്കർബന്ദ വനമേഖലയിൽ സിആർപിഎഫ് കോബ്ര ബറ്റാലിയനും ബിഹാർ പൊലീസ് എസ്ടിഎഫും ചേർന്നു നടത്തിയ റെയ്ഡിലാണ് ആയുധശേഖരം കണ്ടെത്തിയത്. ആരെയും അറസ്റ്റു ചെയ്തിട്ടില്ല. റോക്കറ്റ് ലോഞ്ചറും 300 ബോംബുകളും തോക്കുകളും പിടിച്ചെടുത്തു.
സുരക്ഷാ സേനകൾക്കു നേരെ വൻ ആക്രമണത്തിനു മാവോയിസ്റ്റുകൾ പദ്ധതിയിടുന്നെന്ന രഹസ്യ വിവരത്തിന്റെ അടിസ്ഥാനത്തിലായിരുന്നു റെയ്ഡ്. ഇതേത്തുടർന്ന് ഒരാഴ്ചയായി ചക്കർബന്ദ വനമേഖലയിൽ സിആർപിഎഫും ബിഹാർ പൊലീസും തിരച്ചിൽ നടത്തുകയായിരുന്നു. ഒളിവിലുള്ള മാവോയിസ്റ്റ് സംഘത്തിനായി തിരച്ചിൽ തുടരും.
