ദുബൈ: കൊവിഡ് മഹാമാരിക്ക് മുമ്പുള്ളത് പോലെ ഇന്ത്യന് നഗരങ്ങളിലേക്കുള്ള എല്ലാ സര്വീസുകളും വീണ്ടും തുടങ്ങാനൊരുങ്ങി എമിറേറ്റ്സ് എയര്ലൈന്. ഏപ്രില് ഒന്നു മുതലാണ് എമിറേറ്റ്സിന്റെ ഇന്ത്യയിലേക്കുള്ള സര്വീസുകള് വര്ധിപ്പിക്കുന്നത്. ഇന്ത്യയിലെ ഒമ്പത് നഗരങ്ങളിലേക്ക് ആഴ്ചയില് 170 സര്വീസുകളാണ് ആകെ നടത്തുക.
കൊച്ചിയിലേക്ക് ആഴ്ചയില് 14ഉം തിരുവനന്തപുരത്തേക്ക് ഏഴ് സര്വീസുകളും ഇതില് ഉള്പ്പെടും. മുംബൈ-35, ന്യൂഡല്ഹി-28, ബെംഗളൂരു-24, ചെന്നൈ-21, ഹൈദരാബാദ്-21, കൊല്ക്കത്ത-11, അഹമ്മദാബാദ്-9 എന്നിങ്ങനെയാണ് മറ്റ് സര്വീസുകള്. എയര് ബബിള് കരാര് ഞായറാഴ്ച അവസാനിക്കും. ഇതോടെ വിമാന സര്വീസുകള് പഴയപടിയാകും. അന്താരാഷ്ട്ര വ്യോമ ഗതാഗതത്തിന് ഇന്ത്യ ഏര്പ്പെടുത്തിയിരുന്ന വിലക്കുകള് മാര്ച്ച് 27ന് അവസാനിക്കാനിരിക്കെയാണ് വിമാന സര്വീസുകള് സാധാരണ നിലയിലാകുമെന്ന് വിമാന കമ്പനി അറിയിച്ചത്.
