പനമരം(വയനാട്): പനമരത്തിനു സമീപം ആറാംമൈല്‍ കുണ്ടാലയില്‍ യുവാവ് ഭാര്യയെ കഴുത്തുഞെരിച്ച് കൊന്നു. കുണ്ടാലയിലെ ബന്ധു മൂന്നാംബ്രവന്‍ റഷീദിന്റെ വീട്ടിലെത്തിയ കോഴിക്കോട് ഒളവണ്ണ കൊടിനാട്ടുമുക്ക് കൈതവളപ്പില്‍ നജ മന്‍സിലില്‍ നിദ ഷെറിന്‍ (22) ആണ് കൊല്ലപ്പെട്ടത്. സംഭവത്തില്‍ ഭര്‍ത്താവ് അബൂബക്കര്‍ സിദ്ദീഖ് (28) നെ പനമരം പോലീസ് അറസ്റ്റ് ചെയ്തു.
തിങ്കളാഴ്ച പുലര്‍ച്ചെ 2.30-ഓടെയാണ് കൊലപാതകം നടന്നത്. സംശയത്തെത്തുടര്‍ന്ന് ഭാര്യയെ കഴുത്തുഞെരിച്ച് കൊലപ്പെടുത്തുകയായിരുന്നുവെന്ന് പോലീസ് അറിയിച്ചു. ഞായറാഴ്ച വൈകീട്ട് 4.30-ഓടെയാണ് ഒന്നരവയസ്സുള്ള മകന്‍ മുഹമ്മദ് സിനാനൊപ്പം ദമ്പതിമാര്‍ ബൈക്കില്‍ കുണ്ടാലയിലെ ബന്ധുവീട്ടില്‍ എത്തിയത്. മൈസൂരിലേക്ക് വിനോദയാത്രയ്ക്ക് പോകുംവഴിയാണ് ഇവര്‍ ബന്ധുവീട്ടിലെത്തിയത്. ആറുമണിക്ക് കര്‍ണാടക ചെക്‌പോസ്റ്റ് അടയ്ക്കുന്നതിനാല്‍ തിങ്കളാഴ്ച രാവിലെ പോവാമെന്ന് വീട്ടുകാര്‍ പറഞ്ഞതോടെ അവിടെ താമസിക്കുകയായിരുന്നു. കൊലപാതകവിവരം ആദ്യം സഹോദരനെയാണ് പ്രതി വിളിച്ചറിയിച്ചത്. ഇദ്ദേഹം കോഴിക്കോട് പോലീസ് സ്റ്റേഷനില്‍ വിവരമറിയിച്ചു. അവിടെനിന്നുള്ള വിവരപ്രകാരം പനമരം പോലീസ് എത്തിയ ശേഷമാണ് റഷീദും കുടുംബവും സംഭവമറിയുന്നത്.
നാലുവര്‍ഷംമുമ്പാണ് ഇരുവരും വിവാഹിതരായത്. നിദയ്ക്ക് മറ്റൊരാളുമായി അടുപ്പമുള്ളതായി നേരത്തേ സിദ്ദീഖിന് സംശയമുണ്ടായിരുന്നു. രാത്രിയില്‍ ഇരുവരും തമ്മില്‍ ഇതെച്ചൊല്ലി വാഗ്വാദമുണ്ടായി. പിന്നീട് ഉറക്കത്തിനിടെ കഴുത്തുഞെരിച്ച് ശ്വാസംമുട്ടിച്ച് കൊലപ്പെടുത്തിയെന്ന് സിദ്ദീഖ് പറഞ്ഞതായി പോലീസ് പറഞ്ഞു. കൊലപ്പെടുത്തണമെന്ന ഉദ്ദേശ്യത്തോടെയായിരുന്നു യാത്രയ്ക്ക് പുറപ്പെട്ടതെന്നും സിദ്ദീഖ് മൊഴിനല്‍കിയിട്ടുണ്ട്.
