ഭോപ്പാൽ∙ വെള്ളംകുടിക്കാനായി തുറന്ന കുപ്പിയിലുണ്ടായിരുന്നത് മൂത്രം. മധ്യപ്രദേശിലെ ഭോപ്പാലിലെ സർക്കാർ സ്കൂൾ ടീച്ചർക്കാണ് ദുരനുഭവം ഉണ്ടായത്. വെള്ളം കുടിക്കാനായി കുപ്പിയുടെ അടപ്പു തുറന്നപ്പോൾ മൂത്രം കലർത്തിയ വെള്ളമായിരുന്നു കുപ്പിയിലുണ്ടായിരുന്നത്. സംഭവത്തെ തുടർന്ന് അധ്യാപിക പൊലീസില്‍ പരാതി നൽകി.രാജസ്ഥാനുമായി അതിർഥി പങ്കിടുന്ന നീമുച്ച് ജില്ലയിലാണു സംഭവം. കുപ്പിതുറന്നപ്പോൾ മൂത്രത്തിന്റെ മണം ഉണ്ടായിരുന്നതായി അധ്യാപിക നൽകിയ പരാതിയിൽ പറയുന്നു. വെള്ളം കുടിച്ചപ്പോൾ രുചിയിലും മാറ്റമുണ്ടായിരുന്നു. തുടർന്ന് തന്റെ സഹപ്രവർത്തകരോട് പരിശോധിക്കാൻ ആവശ്യപ്പെട്ടു. അവരും മൂത്രത്തിന്റെ മണമുണ്ടെന്നു പറഞ്ഞതായി അധ്യാപിക പരാതിയിൽ വ്യക്തമാക്കുന്നുണ്ട്.സംഭവത്തിൽ ഡിഇഒയ്ക്ക് അധ്യാപിക പരാതി നൽകിയിട്ടുണ്ട്. പൊലീസിൽ പരാതി നൽകിയിട്ടുണ്ടെന്ന് ജില്ലാ വിദ്യാഭ്യാസ ഓഫിസർ സി.കെ. ശര്‍മ പറഞ്ഞു. സംഭവത്തെ കുറിച്ച് കൂടുതൽ അന്വേഷിച്ചു വരികയാണെന്ന് പൊലീസ് അറിയിച്ചു
