തിരുവനന്തപുരം : ഫെയ്സ്ബുക്ക് അക്കൗണ്ടിൽ നിന്നെടുത്ത ഉന്നത സർക്കാർ ഉദ്യോഗസ്ഥയുടെ ഫോട്ടോ മോർഫ് ചെയ്തശേഷം വ്യാജ ഫെയ്സ്ബുക്ക് അക്കൗണ്ട് വഴി പ്രചരിപ്പിച്ച കേസിലെ ഒന്നാംപ്രതി അറസ്റ്റിൽ. ചാല വൃന്ദാവൻ ലൈനിൽ മുറിപ്പാലത്തടി വീട്ടിൽ അഭിലാഷി (25)നെയാണ് സിറ്റി സൈബർ പോലീസ് അറസ്റ്റു ചെയ്തത്. ഉദ്യോഗസ്ഥയുടെ മോർഫ് ചെയ്ത ഫോട്ടോ ഇയാളുടെ വ്യാജ ഫെയ്സ്ബുക്ക് അക്കൗണ്ടിലും പോൺ ഫെയ്സ്ബുക്ക് പേജ് വഴിയും പ്രചരിപ്പിച്ചു. ഫെയ്സ്ബുക്ക്, ഗൂഗിൾ, ജിയോ അധികാരികളിൽ നിന്നു ലഭിച്ച വിവരങ്ങളുടെ അടിസ്ഥാനത്തിൽ പ്രതിയുടെ മെയിൽ വിലാസം, ഐ.പി. അഡ്രസ്, മൊബൈൽ നമ്പരുകളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ അറസ്റ്റു ചെയ്തത്. ഈ ചിത്രം ഷെയർ ചെയ്ത് പ്രചരിപ്പിക്കുകയും അശ്ലീല കമന്റുകൾ പോസ്റ്റ് ചെയ്യുകയും ചെയ്ത രണ്ടാംപ്രതി കോഴിക്കോട് പുതുപ്പാടി നെരോത്ത് വീട്ടിൽ ബാബു (42)വിനെ കോഴിക്കോടുനിന്നു നേരത്തെ അറസ്റ്റ് ചെയ്തിരുന്നു.
സിറ്റി പോലീസ് കമ്മിഷണർ ബൽറാം കുമാർ ഉപാദ്ധ്യായയുടെ നിർദേശപ്രകാരം സിറ്റി സൈബർ സ്റ്റേഷൻ ഡിവൈ.എസ്.പി. ടി.ശ്യാംലാലിന്റെ നേതൃത്വത്തിൽ നടത്തിയ അന്വേഷണത്തിലാണ് പ്രതികളെ അറസ്റ്റു ചെയ്തത്. സൈബർ ക്രൈം പോലീസ് സ്റ്റേഷൻ ഇൻസ്പെക്ടർ പ്രകാശ് എസ്.പി., എസ്.ഐ. മനു ആർ.ആർ., പോലീസ് ഓഫീസർമാരായ വിനീഷ് വി.എസ്., സമീർഖാൻ എ. എസ്., മിനി എസ്. എന്നിവരടങ്ങിയ സംഘമാണ് അറസ്റ്റിനു നേതൃത്വം നൽകിയത്.
