കോഴിക്കോട് : മീഞ്ചന്ത ഗവ.ആർട്സ് കോളജിന് സമീപം പിക്കപ് വാൻ ഇടിച്ച് സ്കൂട്ടർ യാത്രക്കാരൻ മരിച്ചു. ഫ്രാൻസിസ് റോഡ് തോട്ടൂളിപാടം ദാറുൽ ഹസയിൽ ഇസ്ഹാം മിഷാബ് (താപ്പ-45) ആണ് മരിച്ചത്. കബറടക്കം വൈകിട്ട് കണ്ണംപറമ്പ് പള്ളിയിൽ.
ചൊവ്വാഴ്ച പുലർച്ചെ നാലിനായിരുന്നു അപകടം. മീഞ്ചന്ത അഗ്നിരക്ഷാ സേനയുടെ ആംബുലൻസിലാണ് ആശുപത്രിയിലെത്തിച്ചത്. കല്ല് കരാറുകാരനും പരപ്പിൽ ശാദുലിപ്പള്ളി മുക്രിയുമായിരുന്ന ഉമ്മറിന്റെയും റുഖിയയുടെയും മകനാണ്. എണ്ണപ്പലഹാര കച്ചവടക്കാരനായ ഇസ്ഹാം, ഫുട്ബോൾ താരവുമായിരുന്നു.എംഎം ഹൈസ്കൂളിന് 1997-98 വർഷം സുബ്രദോ മുഖർജി കപ്പ് നേടിക്കൊടുത്ത ടീമിന്റെ പ്രധാന കളിക്കാരനാണ്. ആ വർഷംതന്നെ കേരള ടീമിനെ പ്രതിനിധീകരിച്ച് ബിഹാറിൽ നടന്ന ഇന്റർസ്റ്റേറ്റ് സ്കൂൾ ടൂർണമെന്റിലും കളിച്ചു. ഗുരുവായൂരപ്പൻ കോളജ് ടീമിനു വേണ്ടിയും കേരള ജുനിയർ ടീമിന് വേണ്ടിയും ജഴ്സി അണിഞ്ഞു. ഭാര്യ: റൂബീന. മകൾ: അസ റുഖിയ.
