കൊച്ചി : വ്ലോഗറും മോഡലുമായിരുന്ന കണ്ണൂർ സ്വദേശി നേഹയെ (27) പോണേക്കരയിലെ ഫ്ലാറ്റിൽ തൂങ്ങിമരിച്ച നിലയിൽ കണ്ട സംഭവത്തിൽ ദുരൂഹത. തിങ്കളാഴ്ച ഉച്ചയോടെയാണ് ഇവരെ ഫ്ലാറ്റിൽ മരിച്ച നിലയിൽ കണ്ടെത്തിയത്. ആറു മാസമായി ഇവർ ഒരു യുവാവിനൊപ്പമാണ് ഇവിടെ താമസിച്ചിരുന്നത്. ഫ്ലാറ്റിൽ നടത്തിയ പരിശോധനയിൽ എം.ഡി.എം.എ. കണ്ടെത്തിയതും ഫ്ലാറ്റിനു സമീപത്തുനിന്ന് കാസർകോട് സ്വദേശി അബ്ദുൾ സലാമിനെ 8.120 ഗ്രാം എം.ഡി.എം.എ.യുമായി പിടികൂടിയതുമാണ് സംഭവത്തിൽ ദുരൂഹത വർധിപ്പിച്ചത്. സംഭവ ദിവസം ഉച്ചയോടെ ഒപ്പമുണ്ടായിരുന്ന യുവാവ് ഭക്ഷണം വാങ്ങി തിരികെ വന്നപ്പോൾ ഫ്ലാറ്റ് അടച്ചിട്ടിരിക്കുന്നതാണ് കണ്ടത്. ഇയാൾ സുഹൃത്തായ അബ്ദുൾ സലാമിനെ വിളിച്ചുവരുത്തുകയായിരുന്നു.
നേഹ ആത്മഹത്യ ചെയ്യുമെന്നു കാണിച്ച് സുഹൃത്തുക്കളിൽ ചിലർക്ക് അയച്ച സന്ദേശം പോലീസ് കണ്ടെടുത്തിട്ടുണ്ട്. ഇതേക്കുറിച്ച് കൂടുതൽ അന്വേഷണം നടത്തേണ്ടതുണ്ടെന്ന് പോലീസ് അറിയിച്ചു. വിവാഹിതയെങ്കിലും ഭർത്താവിൽനിന്ന് അകന്നു കഴിയുകയായിരുന്നു ഇവർ. ആറു മാസം മുൻപാണ് കൊച്ചിയിൽ എത്തിയത്. കോവിഡ് മാനദണ്ഡങ്ങൾ പാലിച്ച് പോസ്റ്റ്മോർട്ടം നടത്തി യുവതിയുടെ മൃതദേഹം ബന്ധുക്കൾക്ക് വിട്ടുകൊടുത്തു.
