കൊച്ചി : പതിനാറുകാരിയെ പീഡിപ്പിച്ച കേസിൽ പെൺകുട്ടിയുടെ അമ്മയ്ക്കും അമ്മയുടെ സുഹൃത്തിനും കഠിന തടവ്. കുട്ടിയുടെ അമ്മയുടെ സുഹൃത്ത് ഒന്നാം പ്രതി വാഴക്കുളം കട്ടാലിക്കുഴി വീട്ടിൽ അരുൺ തോമസി (32) ന് 20 വർഷം തടവും രണ്ട് ലക്ഷം രൂപ പിഴയുമാണ് കോടതി വിധിച്ചിരിക്കുന്നത്. രണ്ടാം പ്രതിയായ 45-കാരി അമ്മയ്ക്ക് 10 വർഷം കഠിന തടവും 50,000 രൂപ പിഴയുമാണ് ശിക്ഷ. എറണാകുളം പോക്സോ കോടതി ജഡ്ജി കെ. സോമനാണ് ശിക്ഷ വിധിച്ചത്.
2017-ലായിരുന്നു സംഭവം. അരുൺ പെൺകുട്ടിയെ ഒട്ടേറെ സ്ഥലങ്ങളിൽ കൊണ്ടുപോയി പീഡിപ്പിച്ചെന്നാണ് കേസ്. പെൺകുട്ടിയുടെ അമ്മയുടെ ഒത്താശയോടെയായിരുന്നു ഇത്. പ്രതികൾക്കെതിരേ ഇന്ത്യൻ ശിക്ഷാ നിയമപ്രകാരവും പോക്സോ നിയമപ്രകാരവുമാണ് കുറ്റം ചുമത്തിയിരിക്കുന്നത്. പ്രതികളിൽനിന്ന് ഈടാക്കുന്ന പിഴത്തുക പെൺകുട്ടിക്ക് നൽകാനും കോടതി ഉത്തരവിട്ടിട്ടുണ്ട്. രാമമംഗലം പോലീസാണ് കേസ് രജിസ്റ്റർ ചെയ്തത്. പുത്തൻകുരിശ് സി.ഐ.യായിരുന്ന എ.എൽ. യേശുദാസാണ് പ്രതികൾക്കെതിരേ അന്വേഷണം പൂർത്തിയാക്കി കോടതിയിൽ കുറ്റപത്രം നൽകിയത്. പ്രോസിക്യൂഷനുവേണ്ടി സ്പെഷ്യൽ പ്രോസിക്യൂട്ടർ പി.എ. ബിന്ദു, അഡ്വ. സരുൺ മാങ്കറ തുടങ്ങിയവർ ഹാജരായി.
