മുംബൈ : 16 മാസം മാത്രം പ്രായമുള്ള മകളെ പീഡിപ്പിച്ച ശേഷം കൊലപ്പെടുത്തി മൃതദേഹവുമായി യാത്ര ചെയ്ത തെലങ്കാന സെക്കന്തരാബാദ് നിവാസികളായ ദമ്പതികളെ സോലാപുര്‍ റെയില്‍വേ പൊലീസ് പിടികൂടി. ഗുജറാത്തിലെ രാജ്കോട്ടിലേക്കുള്ള ട്രെയിനില്‍ നിന്ന് കുട്ടിയുടെ മൃതദേഹവുമായി വ്യാഴാഴ്ചയാണ് ഇരുവരും പിടിയിലായത്.
കുട്ടിയുടെ 26 വയസ്സുകാരനായ പിതാവ് കഴിഞ്ഞ 3ന് സെക്കന്തരാബാദിലെ വീട്ടില്‍ മകളെ ലൈംഗികമായി പീഡിപ്പിക്കുകയും കഴുത്തു ഞെരിച്ച് കൊലപ്പെടുത്തുകയും ചെയ്‌തെന്നാണു നിഗമനം. കുറ്റകൃത്യത്തില്‍ അമ്മ കൂട്ടുനിന്നുവെന്നു പൊലീസ് പറയുന്നു. മൃതദേഹം ജന്മനാട്ടില്‍ എത്തിച്ച് ഉപേക്ഷിക്കാനായിരുന്നു പദ്ധതി. യാത്രയ്ക്കിടെ കുട്ടിക്ക് അനക്കം കാണാത്തതിനാല്‍ സംശയം തോന്നിയ യാത്രക്കാര്‍ ടിക്കറ്റ് എക്‌സാമിനറെ വിവരം അറിയിക്കുകയായിരുന്നു.
