മയാമി : യു.എസില്‍ 1980-കളിലും 90-കളിലും ഏറെ ജനപ്രീതി നേടിയ ‘ഫുള്‍ ഹൗസ്’ ടെലിവിഷന്‍ സീരീസ് താരവും ഹാസ്യനടനുമായ ബോബ് സഗെറ്റിയെ (65) മരിച്ചനിലയില്‍ കണ്ടെത്തി. ഫ്‌ളോറിഡയിലെ ഹോട്ടല്‍മുറിയിലാണ് മൃതദേഹം കണ്ടെത്തിയത്. മരണകാരണം വ്യക്തമല്ല. കുടുംബമാണ് മരണവിവരം പുറത്തുവിട്ടത്. അമേരിക്കയുടെ പിതാവ് എന്ന് ഒരുകാലത്ത് ജനങ്ങള്‍ അദ്ദേഹത്തെ വിശേഷിപ്പിച്ചിരുന്നു. മയക്കുമരുന്ന് ഉപയോഗിച്ചതിന്റെയോ കൊലപാതക ശ്രമത്തിന്റെയോ തെളിവുകളൊന്നും മുറിയില്‍ നിന്ന് കിട്ടിയിട്ടില്ലെന്ന് പോലീസ് പറഞ്ഞു. മരിക്കുന്നതിന്റെ തലേദിവസം ഒരു പരിപാടിയില്‍ പങ്കെടുത്തിരുന്നു. 1956-ല്‍ ഫിലാഡല്‍ഫിയയിലാണ് ബോബിന്റെ ജനനം. മൂന്നു മക്കളുണ്ട്. രണ്ടാംഭാര്യ കെല്ലി റിസ്സോയ്‌ക്കൊപ്പമായിരുന്നു താമസം. എട്ടു സീസണുകളിലായാണ് ‘ഫുള്‍ ഹൗസ്’ സീരീസ് സംപ്രേഷണം ചെയ്തിരുന്നത്.
