ദില്ലി: ഡല്‍ഹി ബിജെപി നേതാവ് സുരേന്ദ്ര മതിയാലയെ ഓഫീസില്‍ വെച്ച് രണ്ട് അജ്ഞാതര്‍ വെടിവെച്ചുകൊന്നു. വെള്ളിയാഴ്ച വൈകുന്നേരമായിരുന്നു സംഭവം. രാത്രി 7:30 ഓടെ സുരേന്ദ്രയും മരുമകനും ദ്വാരകയിലെ ഓഫിസില്‍ ടിവി കാണുകയായിരുന്നു. ഇതിനിടയില്‍ മുഖം മറച്ചെത്തിയ രണ്ടുപേര്‍ ബിജെപി നേതാവിനെ മര്‍ദിക്കുകയും വെടിയുതിര്‍ക്കുകയും ചെയ്തു. കൊലപാതകികളെ ഇതുവരെ തിരിച്ചറിഞ്ഞിട്ടില്ലെന്ന് പോലീസ് അറിയിച്ചു. ആകെ മൂന്ന് അക്രമികളാണ് ഉണ്ടായിരുന്നതെന്ന് പൊലീസ് പറഞ്ഞു. രണ്ടുപേര്‍ സുരേന്ദ്രയെ കൊല്ലാന്‍ ഓഫീസില്‍ കയറിയപ്പോള്‍ ഒരാള്‍ ബൈക്കുമായി കെട്ടിടത്തിന് പുറത്ത് കാത്തുനില്‍ക്കുകയായിരുന്നു. കുറ്റകൃത്യം ചെയ്ത ശേഷം മൂന്നുപേരും ബൈക്കിലാണ് രക്ഷപ്പെട്ടതെന്നും പോലീസ് പറഞ്ഞു.
അതേസമയം തന്റെ പിതാവിന് ആരുമായും ശത്രുതയില്ലെന്നും കൊലപാതകത്തില്‍ ഉള്‍പ്പെട്ടവരെ പോലീസ് ഉടന്‍ അറസ്റ്റ് ചെയ്യണമെന്നും സുരേന്ദ്രയുടെ മകന്‍ പറഞ്ഞു. കൊലപാതകത്തിന് പിന്നില്‍ വ്യക്തി വൈരാഗ്യമാണെന്നാണ് പ്രാഥമിക നിഗമനം.
