പാലക്കാട്: സത്യപാല് മാലിക്കിന്റെ വെളിപ്പെടുത്തലിന് പിന്നാലെ പ്രധാനമന്ത്രി നരേന്ദ്രമോദിക്കെതിരെ വിമര്ശനവുമായി യൂത്ത് കോണ്ഗ്രസ് സംസ്ഥാന അധ്യക്ഷനും എം എല് എയുമായ ഷാഫി പറമ്പില് രംഗത്ത്. മോദിയുടെ രാജ്യ സ്നേഹം ഡിഗ്രി സര്ട്ടിഫിക്കറ്റ് പോലെ തന്നെ വ്യാജമാണെന്നാണ് ഷാഫി അഭിപ്രായപ്പെട്ടത്. അതി ദേശീയതയുടെ വൈകാരികത കുത്തി നിറച്ച പ്രസംഗങ്ങള്ക്കപ്പുറത്തേക്ക് പട്ടാളക്കാരന്റെ ജീവത്യാഗം ഭരണം പിടിക്കാനുള്ള കാരണം മാത്രമായി കണ്ടത് കൊണ്ടാണ് തെറ്റ് ചൂണ്ടിക്കാണിച്ച ഗവര്ണ്ണറോട് അതിനെ പറ്റി വാ തുറക്കേണ്ടെന്ന് ഒരു പ്രധാനമന്ത്രി പറഞ്ഞതെന്നും ഷാഫി പറഞ്ഞു.ഫേസ്ബുക്ക് കുറിപ്പിലൂടെയാണ് ഷാഫി പറമ്പിലിന്റെ വിമര്ശനം.
പ്രധാനമന്ത്രിക്കെതിരായ സത്യപാല് മാലിക്കിന്റെ പ്രതികരണം വലിയ വിവാദത്തിനാണ് വഴിവച്ചിരിക്കുന്നത്. പുല്വാമയില് സൈനികര്ക്ക് നേരെയുണ്ടായ ഭീകരാക്രമണത്തിന് കാരണമായത് കേന്ദ്ര ആഭ്യന്തരമന്ത്രാലയത്തിന്റെ വീഴ്ചയെന്നായിരുന്നു സത്യപാല് മാലിക് പറഞ്ഞത്. ഇത് പുറത്തുപറയരുതെന്ന് നിര്ദേശമുണ്ടായിരുന്നുവെന്നും സര്ക്കാരിനും ബിജെപിക്കും തെരഞ്ഞെടുപ്പ് നേട്ടമുണ്ടാക്കുന്ന രീതിയില് ഇതിനെ ഉപയോഗിച്ചുവെന്നും സത്യപാല് മാലിക് ആരോപിച്ചു.
