സിയാറ്റില്‍: യുഎസിലെ സിയാറ്റിലിലെ ആപ്പിള്‍ സ്റ്റോറിലേക്ക് തുരങ്കമുണ്ടാക്കി കവര്‍ച്ച. ഈ സ്‌റ്റോറില്‍ നിന്ന് തുരങ്കം വഴി മോഷ്ടാക്കള്‍ കടത്തിയത് 436 ഐഫോണുകളാണ്. അഞ്ചു ലക്ഷം ഡോളര്‍ (4.10 കോടിയോളം രൂപ) വിലമതിക്കുന്ന ഫോണുകളാണ് അല്‍ഡര്‍വുഡ് മാളിലെ ആപ്പിള്‍ സ്റ്റോറില്‍നിന്ന് മോഷ്ടിക്കപ്പെട്ടത്. സ്റ്റോറിനു സമീപത്തെ ‘സിയാറ്റില്‍ കോഫി ഗിയര്‍’ എന്ന കോഫി ഷോപ്പിന്റെ പൂട്ടു തകര്‍ത്ത് ഉള്ളില്‍ കടന്ന രണ്ടു മോഷ്ടാക്കള്‍ അവിടുത്തെ അവിടത്തെ ശുചിമുറിയുടെ ഭിത്തി പൊളിച്ചാണ് ആപ്പിള്‍ സ്റ്റോറിലേക്ക് തുരങ്കമുണ്ടാക്കിയത്.
സ്റ്റോറിന്റെ വാതില്‍ തകര്‍ക്കാന്‍ ശ്രമിച്ചാല്‍ അലാം മുഴങ്ങും എന്നതിനാലാകാം അടുത്തുള്ള കടയുടെ ഭിത്തി തുരന്ന് മോഷണം നടത്തിയതെന്നു കരുതുന്നു. ആപ്പിള്‍ സ്റ്റോറിനോട് ചേര്‍ന്നാണ് തങ്ങളുടെ കോഫി ഷോപ്പെന്ന് അറിയില്ലായിരുന്നുവെന്നാണ് സിയാറ്റില്‍ കോഫി ഗിയര്‍ സിഇഒ മൈക്ക് അറ്റ്കിന്‍സന്‍ പ്രതികരിച്ചത്.
