മാനന്തവാടി∙ ആദിവാസി യുവതിയെ വിവാഹ വാഗ്ദാനം നല്കി ബലാത്സംഗം ചെയ്ത കേസിൽ യുവാവ് അറസ്റ്റിൽ. പനവല്ലി കോമത്ത് വീട്ടില് അജീഷ്(32) ആണ് അറസ്റ്റിലായത്. മാനന്തവാടി എസ്എംഎസ് ഡിവൈഎസ്പി പി.കെ.സന്തോഷാണ് പ്രതിയെ അറസ്റ്റ് ചെയ്തത്. മേയ് നാലിനാണ് കേസിനാസ്പദമായ സംഭവം. വിവാഹ വാഗ്ദാനം നൽകിയശേഷം യുവതിയെ വീട്ടില്നിന്നു വിളിച്ചിറക്കി കൊണ്ടുപോയി ബലാത്സംഗം ചെയ്തെന്നാണ് പരാതി. ഫോണ് വഴി പരിചയപ്പെട്ട യുവതിയെ അജീഷ് ക്രൂരമായി ബലാംത്സംഗം ചെയ്തെന്നാണു പരാതി. രാത്രിയില് അജീഷിനൊപ്പം ഇറങ്ങിപ്പോയ യുവതിയെ അയാൾ സ്വന്തം വീട്ടിലേക്കു കൂട്ടിക്കൊണ്ടുപോയി അവിടെവച്ചു ബലാത്സംഗം ചെയ്തു. സാരമായി മുറിവേറ്റ് രക്തസ്രാവം വന്ന യുവതിയെ അജീഷും സുഹൃത്തും സുഹൃത്തിന്റെ ഭാര്യയും ചേര്ന്നു പിന്നീട് മാനന്തവാടി മെഡിക്കല് കോളജിലെത്തിക്കുകയായിരുന്നു.
ആശുപത്രിയില് അജീഷാണ് യുവതിയുടെ കൂടെനിന്നു പരിചരിച്ചു വന്നത്. വിവരമറിഞ്ഞ് സ്ഥലത്തെത്തിയ പൊലീസിനോടു പരാതിയൊന്നുമില്ലെന്നും ഉഭയസമ്മത പ്രകാരമാണ് ബന്ധപ്പെട്ടതെന്നുമാണു യുവതി ആദ്യം പറഞ്ഞത്. എന്നാല് വിവാഹ വാഗ്ദാനം നല്കി വഞ്ചിക്കുകയാണെന്നു പിന്നീടു ബോധ്യപ്പെട്ടതിനാലാണ് ഇന്നലെ പൊലീസില് പരാതി നല്കിയതെന്ന് യുവതി പറയുന്നു. കൂടാതെ കുടുംബക്കാര് കൂടെ ഇല്ലാതിരുന്നതിനാലും അജീഷിന്റെ സമ്മര്ദത്താലും പുറത്തു പറയാന് കഴിഞ്ഞില്ലെന്നും യുവതി പരാതിയിൽ പറയുന്നു. തുടര്ന്ന് പൊലീസ് അജീഷിനെതിരെ ബലാത്സംഗത്തിനും എസ്സിഎസ്ടി നിയമപ്രകാരവും കേസെടുത്തശേഷം കസ്റ്റഡിയിലെടുത്ത് ഇന്ന് വൈകിട്ട് അറസ്റ്റ് ചെയ്തു.
