കോഴിക്കോട്: കോഴിക്കോട് കൊമ്മേരിയില്‍ 45 കാരനെ കൊലപ്പെടുത്തിയ കേസില്‍ പ്രതികള്‍ പിടിയില്‍. മെഡിക്കല്‍ കോളേജ് പോലീസാണ് 5 പ്രതികളെ അറസ്റ്റ് ചെയ്തത്. കൊമ്മേരി എരവത്തുകുന്ന് സ്വദേശികളായ അമ്മാട്ടുമീത്തല്‍ സതീശന്‍ (41), അമ്മാട്ടുമീത്തല്‍ സൂരജ് (27), മന്നിങ്ങ് വീട്ടില്‍ മനോജ് (മനു – 52 ), അമ്മാട്ട് ഉമേഷ് (50), അമ്മാട്ട് ജിനേഷ് (48) എന്നിവരെയാണ് അറസ്റ്റ് ചെയ്തത്.
ഞായറാഴ്ച രാവിലെയാണ് കൊമേരി സ്വദേശി കിരണ്‍കുമാറിനെ മരിച്ച നിലയില്‍ കണ്ടെത്തിയത്. മദ്യപിച്ച് വീട്ടിനടുത്തുള്ള വഴിയില്‍ കിടന്ന് അസഭ്യം വിളിച്ചതിനും മുമ്പ് ദോഹോപദ്രവം ഏല്‍പ്പിച്ചതിനുള്ള പ്രതികാരവുമാണ് കൊലപാതകത്തിന്റെ കാരണമെന്ന് പോലീസ് പറഞ്ഞു. പോലീസിന്റെ വിശദമായ അന്വേഷണത്തിലാണ് കിരണ്‍ കുമാറിന്റെ മരണം കൊലപാതകമാണെന്ന് വ്യക്തമാകുന്നത്. അയല്‍വാസികളാണ് സംഘം ചേര്‍ന്ന് കിരണിനെ മര്‍ദ്ദിച്ച് കൊലപൊടുത്തിയത്. തലയിണ നെഞ്ചില്‍ ചേര്‍ത്ത് വെച്ച് കിടക്കുകയായിരുന്ന കിരണ്‍കുമാറിനെ ഈ സംഘം ആക്രമിച്ച് കൊലപ്പെടുത്തുകയായിരുന്നു. വാര്‍ക്കപ്പണിക്കും മറ്റും ഉപയോഗിക്കുന്ന മാരകായുധമായ ഇരുമ്പിന്റെ ആണിപ്പാര ഉപയോഗിച്ച് ഈ സംഘം കിരണ്‍ കുമാറിന്റെ നെഞ്ചിലും മറ്റും പല തവണ അടിച്ചിരുന്നു. ഇതിനൊപ്പം തന്നെ ചവിട്ടിയും ഇടിച്ചും പരിക്കേല്‍പ്പിച്ചിരുന്നു.
