പാലക്കാട്: ഹോട്ടലുടമ സിദ്ദിഖ് വധക്കേസിലെ പ്രതികളായ ഷിബിലിയെയും ഫര്ഹാനയെയും ചെറുതുരുത്തിയില് തെളിവെടുപ്പിന് കൊണ്ടുവന്നു. സിദ്ദിഖിന്റെ പേരില് ഉണ്ടായിരുന്ന ഒരു ചെക്ക് ബുക്കും എടിഎം കാര്ഡും ചെറുതുരുത്തിയിലെ ഒരു കിണറ്റില് നിന്നും കണ്ടെത്തി. ഷിബിലിയാണ് വെള്ളമില്ലാത്ത കിണറ്റിലേക്ക് ഇവ വലിച്ചെറിഞ്ഞിരുന്നത്. നേരത്തെ തിരൂര് കോടതി ഷിബിലിയെയും ഫര്ഹാനയെയും അഞ്ചുദിവസത്തെ പോലീസ് കസ്റ്റഡിയില് വിട്ടിരുന്നു.
കാര് ഉപേക്ഷിച്ച സ്ഥലത്താണ് തെളിവെടുപ്പ് നടത്തിയത്. കൊലക്ക് ശേഷം ഷിബിലിയും ഫര്ഹാനയും അട്ടപ്പാടി ചുരത്തില് മൃതദേഹം ഉപേക്ഷിക്കുകയും തുടര്ന്ന് ഫര്ഹാനയെ വീട്ടിലെത്തിച്ചതിന് ശേഷം കാര് ഇവിടെ ഉപേക്ഷിക്കുകയുമായിരുന്നു. ഇവിടെയുള്ള ഒരു കിണറിന്റെ അടുത്താണ് കാര് ഉപേക്ഷിച്ചത്. കൊലപാതകം നടന്ന കോഴിക്കോട്ടെ ഹോട്ടല്, പ്രതികള് സാമഗ്രികള് വാങ്ങിയ കോഴിക്കോട്ടെ കടകള്, മൃതദേഹം കഷ്ണങ്ങളാക്കി വലിച്ചെറിഞ്ഞ പാലക്കാട് അട്ടപ്പാടിയിലെ ചുരം എന്നിവിടങ്ങളിലാണ് ഇനി പ്രതികളെ തെളിവെടുപ്പിനായി കൊണ്ടുപോകേണ്ടത്.
