തൃശൂര്‍ : മെഡിക്കല്‍ കോളജിലെ ഹൗസ് സര്‍ജന്‍ ലഹരി മരുന്നുമായി പിടിയില്‍. കോഴിക്കോട് സ്വദേശി അഖില്‍ മുഹമ്മദ് ഹുസൈന്‍ ആണ് മെഡിക്കല്‍ കോളജ് പോലീസിന്റെ കസ്റ്റഡിയിലായത്. രണ്ടര ഗ്രാം എംഡിഎംഎയും ഒരു സ്റ്റാംപും ഇയാളില്‍നിന്നു പോലീസ് പിടിച്ചെടുത്തു. മെഡിക്കല്‍ കോളജ് പരിസരത്ത് പെരിങ്ങണ്ടൂര്‍ റോഡിലെ ഒരു സ്വകാര്യ ഹോസ്റ്റലില്‍ നിന്നാണ് യുവാവിനെ വെളുപ്പിന് പോലീസ് പിടികൂടിയത്. ബെംഗളൂരുവില്‍ നിന്നാന്ന് ലഹരി മരുന്ന് എത്തുന്നതെന്നാണ് സൂചന. സുഹൃത്തുക്കളായ ചില ഡോക്ടര്‍മാര്‍ക്കും പിടിയിലായ യുവാവ് വഴി ലഹരി മരുന്ന് കൈമാറ്റം ചെയ്യപ്പെട്ടിട്ടുള്ളതായി പോലീസിന് വിവരം ലഭിച്ചിട്ടുണ്ട്. ഇവരെ കണ്ടെത്താനും പോലീസ് അന്വേഷണം ആരംഭിച്ചു.
മൂന്നു വര്‍ഷമായി ഇയാള്‍ ലഹരി മരുന്ന് ഉപയോഗിക്കുന്നതായാണ് പോലീസിനു ലഭിച്ച വിവരം. മെഡിക്കല്‍ കോളജിനു സമീപമുള്ള ഹോസ്റ്റലുകളില്‍ എംഡിഎംഎയുടെ മറ്റു ലഹരി മരുന്നുകളും വ്യാപകമായി ഉപയോഗിക്കുന്നുണ്ടെന്ന് സിറ്റി ഷേഡോ പൊലീസിനു ലഭിച്ച വിവരത്തിന്റെ അടിസ്ഥാനത്തിലാണ് പരിശോധന നടത്തിയത്. ലഹരിമരുന്ന് ഉപയോഗിക്കുന്ന കൂടുതല്‍ ഡോക്ടര്‍മാരുണ്ടെന്നാണ് അഖില്‍ നല്‍കിയ വിവരം. വിശാഖപട്ടണത്തു നിന്നും കൂടുതല്‍ ന്യൂജനറേഷന്‍ ലഹരിമരുന്നുകള്‍ കേരളത്തിലേക്ക് ഒഴുകുന്നുണ്ടെന്നും പോലീസിനു സൂചന ലഭിച്ചു.
