ഇടുക്കി: കെഎസ്ആര്ടിസി ബസില് നഗ്നതാ പ്രദര്ശനം നടത്തിയ ആളെ ഇടുക്കി തങ്കമണി പോലീസ് അറസ്റ്റു ചെയ്തു. തൃശ്ശൂര് കൊടകര സ്വദേശി സിജു (38) ആണ് പിടിയിലായത്. എറണാകുളത്തു നിന്നും കുമളിയിലേക്ക് വന്ന കെഎസ്ആര്ടിസി ബസിലാണ് സംഭവം. തൃശ്ശൂര് സ്വദേശിയായ സിജു പെരുമ്പാവൂരില് നിന്നാണ് ബസില് കയറിയത്. പെണ്കുട്ടി ഈ സമയം ബസിലുണ്ടായിരുന്നു. നേര്യമംഗലം കഴിഞ്ഞപ്പോള് പെണ്കുട്ടി ഇരുന്ന സീറ്റിലുണ്ടായിരുന്നവര് ഇറങ്ങി. തുടര്ന്ന് പെണ്കുട്ടിക്ക് സമീപം സിജു വന്നിരുന്നു.
കട്ടപ്പനയിലെ റിക്രൂട്ടിംഗ് എജന്സിയിലേക്ക് വന്നതായിരുന്നു സിജു. തങ്കമണിക്ക് സമീപം പാണ്ടിപ്പാറയിലെത്തിയപ്പോള് ഇയാള് നഗ്നത പ്രദര്ശനം നടത്തിയെന്നാണ് പെണ്കുട്ടിയുടെ പരാതി. പെണ്കുട്ടി ഇത് ചോദ്യം ചെയ്തു. ബഹളം കേട്ട് ബസ് ജീവനക്കാരും സഹയാത്രികരുമിടപെട്ടു. തുടര്ന്ന് ബസ് തങ്കമണി പോലീസ് സ്റ്റേഷനിലെത്തിച്ചു. പെണ്കുട്ടിയുടെ മൊഴി എടുത്ത ശേഷം സിജുവിനെ ചോദ്യം ചെയ്തു. ഇതിനു ശേഷമാണ് അറസ്റ്റ് രേഖപ്പെടുത്തിയത്.
