ശ്രീനഗർ: ജമ്മു-കശ്മീരിൽ ലഫ്റ്റനന്റ് ഗവർണർ പങ്കെടുത്ത ചടങ്ങിൽ ദേശീയഗാനം ആലപിക്കുമ്പോൾ എഴുന്നേറ്റ് നിൽക്കാത്തതിന് 12 പേർക്കെതിരെ കേസെടുത്തതായി പൊലീസ്. ദേശീയഗാനം അവതരിപ്പിക്കുമ്പോൾ എല്ലാവരും എഴുന്നേറ്റുനിന്നുവെന്ന് ഉറപ്പുവരുത്തിയില്ലെന്ന് ചൂണ്ടിക്കാട്ടി പൊലീസ് ബാൻഡ് സംഘത്തിനെതിരെ വകുപ്പുതല അന്വേഷണത്തിനും ഉത്തരവിട്ടു.
ജമ്മു-കശ്മീർ പൊലീസ് ജൂണിൽ ശ്രീനഗറിൽ നടത്തിയ ‘പെഡൽ ഫോർ പീസ്’ എന്ന സൈക്ലിങ് പരിപാടിയുടെ സമാപന ചടങ്ങിലാണ് സംഭവം. ഇതേതുടർന്ന് ജമ്മു-കശ്മീർ ഭരണകൂടം അന്വേഷണം ആരംഭിച്ചിരുന്നു. സംഭവത്തിൽ 14 പേർ അറസ്റ്റിലായെന്ന് ആദ്യം വാർത്ത വന്നിരുന്നു.
എന്നാൽ, 12 പേർക്കെതിരെ കേസെടുത്തുവെന്നും നല്ലനടപ്പിന് നിയമനടപടി ആരംഭിച്ചുവെന്നും വിശദീകരിച്ച് ശ്രീനഗർ പൊലീസ് വ്യാഴാഴ്ച ട്വിറ്റർ കുറിപ്പ് ഇറക്കുകയായിരുന്നു.
