കോഴിക്കോട്: കഴിഞ്ഞ ദിവസം ഒരു സഖാവ് വിളിച്ച് താന്‍ കേരള രാഷ്ട്രീയത്തില്‍ നിലനില്‍ക്കണമെന്ന് ആഗ്രഹിക്കുന്നയാളാണെന്നു പറഞ്ഞുവെന്ന് ബി.ജെ.പി നേതാവ് ശോഭാ സുരേന്ദ്രന്‍. കേരളത്തിലെ ജനങ്ങളുടെ പക്ഷത്തുനിന്ന് പ്രവര്‍ത്തിക്കാന്‍ വേണ്ടിയാണ് നരേന്ദ്ര മോദി വി. മുരളീധരനെ കേന്ദ്രമന്ത്രിയാക്കിയത്. കെ-റെയിലില്‍ കെ. സുരേന്ദ്രന്‍ വ്യക്തിപരമായ അഭിപ്രായമാണ് പറഞ്ഞതെന്നും അവര്‍ പറഞ്ഞു. കോഴിക്കോട് മാധ്യമങ്ങളോട് സംസാരിക്കുകയായിരുന്നു ശോഭാ സുരേന്ദ്രന്‍.
”കഴിഞ്ഞ ദിവസം ഒരു ഫോണ്‍കോള്‍ വന്നു. താന്‍ കടുത്ത കമ്മ്യൂണിസ്റ്റുകാരനാണെന്നും ബി.ജെ.പിയോട് അനുഭാവമുള്ള ആളല്ലെന്നും പരിചയപ്പെടുത്തി. പക്ഷെ, ശോഭാ സുരേന്ദ്രന്‍ കേരള രാഷ്ട്രീയത്തില്‍ നിലനില്‍ക്കണമെന്ന് ആഗ്രഹിക്കുന്ന സഖാവാണെന്നും പറഞ്ഞു. ഞാന്‍ ഇവിടെ പ്രവര്‍ത്തിക്കുന്നതില്‍ എന്താണ് തെറ്റ്, ഒരു കൈ എല്ലാവരും തരുമെന്നാണ് പ്രതീക്ഷ.”- ശോഭ പറഞ്ഞു.കേരളത്തിലെ ജനങ്ങളുടെ പക്ഷത്തുനിന്ന് പ്രവര്‍ത്തിക്കാന്‍ വേണ്ടിയാണ് നരേന്ദ്ര മോദി വി. മുരളീധരനെ കേന്ദ്രമന്ത്രിയായി നിയമിച്ചത്. മോദി വരദാനമായി നല്‍കിയ രാജ്യസഭാ സീറ്റിലൂടെ മന്ത്രിയായ അദ്ദേഹം ഭാവിയില്‍ കേരളത്തിനു വേണ്ടി പ്രവര്‍ത്തിക്കുമെന്നാണ് വിശ്വസിക്കുന്നതെന്ന് ശോഭ പറഞ്ഞു.
