കോന്നി > ഒന്നര വർഷം മുമ്പ് വീടും നാടുമുപേക്ഷിച്ച് പോയ നൗഷാദിന്റെ തിരോധാനത്തെക്കുറിച്ചുള്ള കൂടുതൽ വിവരങ്ങൾ പുറത്തായി. ഭാര്യ അഫ്സാനയും സുഹൃത്തുക്കളും ചേർന്ന് നൗഷാദിനെ ക്രൂരമായി മർദ്ദിച്ച അന്നുമുതലാണ് നൗഷാദിനെ കാണാതായത്. ബോധം നഷ്ടപ്പെട്ട് അവശനിലയിലായ നൗഷാദ് മരിച്ചുവെന്ന് കരുതി പരുത്തിപ്പാറയിലെ വാടകവീട്ടിൽ ഉപേക്ഷിച്ച് ഇവർ പോവുകയായിരുന്നു.ബോധം തിരിച്ചു കിട്ടിയ നൗഷാദ് അവർ വീണ്ടും വന്ന് കൊല്ലുമെന്ന് ഭയന്ന് സ്ഥലം വിടുകയായിരുന്നു. ഭാര്യ അഫ്സാ ന പിന്നീട് വാടക വീട്ടിൽ വന്നന്വേഷച്ചപ്പോൾ ആളെ കണ്ടെത്താനായില്ല. മറ്റു വിവരങ്ങളും ഇല്ലാതെ വന്നപ്പോൾ ഭർത്താവ് മരിച്ചതായും മർദ്ദിച്ചവർ തന്നെ കുഴിച്ചിട്ടതായും വിശ്വസിക്കുകയായിരുന്നു. അതിന്റെ അടിസ്ഥാനത്തിലാണ് നൗഷാദിനെ കൊലപ്പെടുത്തിയെന്ന് അഫ്സാന പൊലീസിന് മൊഴി നൽകിയത് എന്നാണ് പൊലീസ് ഭാഷ്യം.
പൊലീസിനെ കബളിപ്പിച്ചു എന്ന കേസ് മാത്രമാണ് അഫ്സാനയുടെ പേരിൽ ചുമത്തിയിട്ടുള്ളത്. ആ കേസുമായി പൊലീസ് മുന്നോട്ട് പോകുമെന്ന് കോന്നി ഡിവൈഎസ്പി കെ രാജപ്പൻ മാധ്യമങ്ങളോട് പറഞ്ഞു. അഫ്സാനയ്ക്കെതിരെ എടുത്ത മറ്റ് കേസിൽ തുടരന്വേഷണമാവശ്യമില്ലെന്ന് പൊലീസ് കോടതിയിൽ റിപ്പോർട്ട് നൽകും. ഇപ്പോൾ റിമാൻഡിൽ കഴിയുന്ന അഫ്സാനയുടെ ജാമ്യാപേക്ഷയെ പൊലീസ് എതിർക്കില്ലന്നും ഡിവൈഎസ്പി പറഞ്ഞു. നൗഷദിനെ റാന്നി കോടതിയിൽ ഹാജരാക്കി. അദ്ദേഹം മാതാപിതാക്കളോടൊപ്പം പാടം വണ്ടണിയിലെ വീട്ടിലേക്ക് മടങ്ങി.
