തിരുവനന്തപുരം: വിതുരയില് കരടി ആക്രമണത്തില് ഒരാള്ക്ക് ഗുരുതര പരുക്ക്. വിതുര മണലി സ്വദേശി ശിവദാസന് കാണിയെയാണ് കരടി ആക്രമിച്ചത്. രാവിലെ ആറുമണിയോടെയാണ് സംഭവം. ആക്രമണത്തില് ഗുരുതരമായി പരിക്കേറ്റ ശിവദാസനെ തിരുവനന്തപുരം മെഡിക്കല് കോളജിലേക്ക് മാറ്റി. ജോലിക്ക് പോകുന്നതിനിടെയാണ് ശിവദാസിനെ കരടി ആക്രമിച്ചത്. ശിവദാസിന് നേരെ പാഞ്ഞടുത്ത കരടി ആക്രമിക്കുകയായിരുന്നു. കരടിയില് നിന്ന് രക്ഷപ്പെടാന് ഇയാള് സമീപത്തെ മരത്തില് കയറിയെങ്കിലും, കരടിയും കൂടെ കയറി. മരത്തില് നിന്ന് താഴേക്ക് തള്ളിയതിന് ശേഷം വീണ്ടും ആക്രമിച്ചു. നിലവിളി കേട്ട് ഓടിക്കൂടിയ നാട്ടുകാരാണ് ശിവദാസിനെ കരടിയില് നിന്നും രക്ഷിച്ചത്. കാലിന് ഗുരുതരമായി പരിക്കേറ്റ ശിവദാസിനെ വിതുര താലൂക്ക് ആശുപത്രിയില് എത്തിച്ചെങ്കിലും പിന്നീട് തിരുവനന്തപുരം മെഡിക്കല് കോളജിലേക്ക് മാറ്റുകയായിരുന്നു.
