അരൂര്‍: ആലപ്പുഴയില്‍ നിയന്ത്രണം തെറ്റിയ ലോറി ഇടിച്ച് കയറി അപകടത്തില്‍പ്പെട്ട സ്‌കൂട്ടര്‍ നിന്ന് കത്തി. സ്‌ക്കൂട്ടര്‍ യാത്രികന്‍ നിസാര പരിക്കുകളോടെ അത്ഭുതകരമായി രക്ഷപ്പെട്ടു. എഴുപുന്ന കരുമാഞ്ചേരി ബിജു (52) വാണ് അത്ഭുതകരമായി വന്‍ അപകടത്തില്‍ നിന്നും രക്ഷപ്പെട്ടത്. അപകടത്തില്‍ ചെറിയ പരുക്കുകള്‍ മാത്രമാണ് ഇയാള്‍ക്ക് സംഭവിച്ചത്. കൈയ്ക്കും കാലിനും പരിക്കേറ്റ ബിജുവിനെ എറണാകുളം ജനറല്‍ ആശുപതിയില്‍ പ്രവേശിപ്പിച്ചിരിക്കുകയാണ്.
അരൂര്‍ പള്ളി ബൈപാസ് കവലയില്‍ കഴിഞ്ഞദിവസം രാവിലെ ആറരക്കായിരുന്നു നാട്ടുകാരെ ഞെട്ടിച്ച അപകടം നടന്നത്. തമിഴ്നാട്ടില്‍ നിന്ന് കയര്‍ കയറ്റി വന്ന ലോറി ചേര്‍ത്തലയില്‍ ചരക്ക് ഇറക്കി തിരികെ തമിഴ്നാട്ടിലേക്ക് മടങ്ങി പോകുമ്പോഴായിരുന്നു സംഭവം നടന്നത്. പുലര്‍ച്ചെ മഴ ഉണ്ടായിരുന്നതിനാല്‍ തെന്നി കിടന്ന റോഡില്‍ പെട്ടെന്ന് ബ്രേക്ക് ചെയ്തപ്പോള്‍ മുന്നില്‍ ഉണ്ടായിരുന്ന ആക്റ്റീവ സ്‌ക്കൂട്ടറില്‍ ലോറി ഇടിച്ച് കയറുകയായിരുന്നു.
