കുമ്പള (കാസർകോട്)∙ കാർ മറിഞ്ഞ് വിദ്യാർഥി മരിച്ച സംഭവത്തിൽ ആരോപണ വിധേയനായ എസ്ഐ താമസിക്കുന്ന ക്വാർട്ടേഴ്സിലെത്തി ഭീഷണി മുഴക്കിയ 2 പേർക്കെതിരെ കേസെടുത്തു. കുമ്പള പൊലീസ് സ്റ്റേഷനിലെ എസ്ഐയുടെ ഭാര്യാ പിതാവ് നൽകിയ പരാതിയിലാണ് നടപടി. ഇരുചക്ര വാഹനത്തിലെത്തിയ 2 യുവാക്കൾ സ്ഥലത്തെത്തുന്നതിന്റെ ദൃശ്യങ്ങൾ സമീപത്തെ സിസിടിവിയിൽനിന്നു ലഭിച്ചു.ചൊവ്വാഴ്ച വൈകിട്ട് 6ന് പെർവാഡ് മാളിയങ്കരയിൽ എസ്ഐ താമസിക്കുന്ന ക്വാർട്ടേഴ്സിലെത്തിയ 2 പേർ വധ ഭീഷണി മുഴക്കിയെന്നാണ് പരാതി. അംഗടിമുഗർ ഗവ. എച്ച്എസ്എസിലെ പ്ലസ്ടു വിദ്യാർഥിയായ മുഹമ്മദ് ഫർഹാസ് ആണ് കാറപകടത്തിൽ മരിച്ചത്. സംഭവത്തിൽ ക്രൈംബ്രാഞ്ച് അന്വേഷണം പുരോഗമിക്കുകയാണ്.
