കൊച്ചി: കോവിഡിന് ശേഷം കേരളത്തിലെ ആഭ്യന്തര വിനോദസഞ്ചാരമേഖലയില് വന്വര്ദ്ധനയെന്ന് മന്ത്രി പി.എ മുഹമ്മദ് റിയാസ്. മറൈന്ഡ്രൈവില് ആരംഭിച്ച ചാമ്പ്യന്സ് ബോട്ട് ലീഗ് മൂന്നാം പതിപ്പിന്റെ ഉദ്ഘാടനം ഓണ്ലൈനായി നിര്വഹിക്കുകയായിരുന്നു അദ്ദേഹം. കേരളത്തിലെ ആഭ്യന്തര വിനോദസഞ്ചാര മേഖലയില് 2022 ലും 2023 ആദ്യ പാദത്തിലും റെക്കോര്ഡ് നേട്ടമാണ് ഉണ്ടായത്. 2022 ജനുവരി മുതല് ജൂണ് വരെ 88,95,593 വിനോദ സഞ്ചാരികളും 2023 ല് ഇതേ കാലയളവില് 10,683,643 വിനോദ സഞ്ചാരികളും കേരളത്തില് എത്തി. 20 ശതമാനം വര്ദ്ധനയാണ് ആഭ്യന്തര വിനോദസഞ്ചാര മേഖലയില് ഉണ്ടായത്.
ടൂറിസം വകുപ്പിന്റെ കണക്ക് പ്രകാരം ആഭ്യന്തര വിനോദസഞ്ചാരികള് ഏറ്റവും കൂടുതലായി എത്തിയിട്ടുള്ളത് എറണാകുളം ജില്ലയിലാണ്. 22,16,250 സഞ്ചാരികള് എത്തിയിട്ടുണ്ട്. 2022 ന് ആദ്യപകുതിയില് 1,05,960 ഉം 2023 ഈ കാലയളവില് 2,87,730 സഞ്ചാരികളും എത്തി. കേരളത്തിന്റെ ഇഷ്ടവിനോദമായ വള്ളംകളിയുടെ ആവേശം ലോകത്ത് ആകമാനം പകര്ന്നു നല്കുക എന്ന ലക്ഷ്യത്തോടെയാണ് ചാമ്പ്യന്സ് ബോട്ട് ലീഗിന് രൂപം നല്കിയിരിക്കുന്നത്. വലിയ രീതിയില് വിനോദസഞ്ചാരികളെ ആകര്ഷിക്കാന് സി.ബി.എല് വഴി സാധിക്കും. വളരെ വിപുലമായി സംഘടിപ്പിക്കുന്ന സി.ബി.എല് മൂന്നാം പതിപ്പ് ഉത്തര മലബാറിലേക്ക് കൂടി വ്യാപിപ്പിച്ചിട്ടുണ്ട്. ഇതിന്റെ ഭാഗമായി ധര്മ്മടം മണ്ഡലത്തില് ചെറുവള്ളങ്ങളുടെ മത്സരം സംഘടിപ്പിച്ചു. വരും വര്ഷങ്ങളില് കൂടുതല് ഭാഗങ്ങളിലേക്ക് സി.ബി.എല് മത്സരങ്ങള് സംഘടിപ്പിക്കുമെന്നും മന്ത്രി പറഞ്ഞു.
