ന്യൂഡല്ഹി : ഇന്ത്യ എന്ന ആശയത്തെ നശിപ്പിക്കുന്നതിനുള്ള കരുവായി ട്വിറ്റര് മാറരുതെന്ന് ട്വിറ്ററിന്റെ പുതിയ ചീഫ് ഓപ്പറേറ്റിങ് ഓഫിസറും ഇന്ത്യന് വംശജനുമായ പരാഗ് അഗ്രവാളിന് എഴുതിയ കത്തില് കോണ്ഗ്രസ് നേതാവ് രാഹുല് ഗാന്ധി. ട്വിറ്ററില് സജീവമാകുന്നതിലും തന്റെ സ്വാധീനം വര്ധിപ്പിക്കുന്നതില്നിന്നും ബോധപൂര്വം തന്നെ തടയുന്നതിനുമായി കേന്ദ്രസര്ക്കാര് ക്യാംപെയിന് നടത്തുന്നതായി കത്തില് രാഹുല് ഗാന്ധി ആരോപിച്ചു. അഭിപ്രായസ്വാതന്ത്ര്യം തടയുന്നതിനുള്ള കേന്ദ്രനീക്കത്തിന് ട്വിറ്റര് കൂട്ടുനില്ക്കുന്നുവെന്നും രാഹുല് കുറ്റപ്പെടുത്തി. ഇന്ത്യയിലെ മുഴുവന് ജനങ്ങള്ക്ക് വേണ്ടിയാണ് താന് ഈ കത്തെഴുതുന്നതെന്നും രാഹുല് പറഞ്ഞു. ഡിസംബര് 27 ന് എഴുതിയ കത്തിലെ വിശദാംശങ്ങള് എന്ഡിടിവിയാണ് പുറത്തുവിട്ടത്. അഭിപ്രായ സ്വാതന്ത്യത്തിന് കൂച്ചുവിലങ്ങിടാന് ബോധപൂര്വമല്ലെങ്കിലും ഭരണകൂടം തങ്ങളെ ഉപയോഗിക്കുന്നില്ലെന്ന് ഉറപ്പു വരുത്താന് ട്വിറ്ററിന് കടമയുണ്ടെന്നും രാഹുല് പറഞ്ഞു.
2021 ഓഗസ്റ്റില് തന്റെ ട്വിറ്റര് അക്കൗണ്ട് എട്ട് ദിവസത്തേക്ക് സസ്പെന്ഡ് ചെയ്തതിനു ശേഷം ട്വിറ്ററില് തന്നെ പിന്തുടരുന്നവരുടെ എണ്ണം കുത്തനെ ഇടിഞ്ഞതായി രാഹുല് ആരോപിക്കുന്നു. 2021ലെ ആദ്യത്തെ ഏഴ് മാസങ്ങളില് ട്വിറ്ററില് നാല് ലക്ഷത്തില് അധികം ഫോളവേഴ്സ് ഉണ്ടായപ്പോള് പിന്നിടുള്ള മാസങ്ങളില് വന് ഇടിവ് ഉണ്ടായി. തന്റെ ട്വിറ്റര് അക്കൗണ്ടിന്റെ വിശദാംശങ്ങള്ക്കൊപ്പം പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, കോണ്ഗ്രസ് നേതാവ് ശശി തരൂര് എന്നിവരുടെ ട്വിറ്റര് അക്കൗണ്ടുകളുമായി താരതമ്യപ്പെടുത്തുന്ന ഡേറ്റയും കത്തിനൊപ്പം ചേര്ത്തിരുന്നു. എന്നാല് തന്റെ ഫോളവേഴ്സിന്റെ കാര്യത്തിലുള്ള കുത്തനെയുള്ള ഇടിവ് മറ്റു നേതാക്കള്ക്കില്ലെന്നും രാഹുല് ഗാന്ധി കണക്കുകള് നിരത്തി വിശദീകരിച്ചു.
ഡല്ഹിയില് പീഡനത്തിനിരയായി കൊല്ലപ്പെട്ട ഒന്പതുകാരിയുടെ മാതാപിതാക്കളുടെ അതിജീവനത്തെ കുറിച്ചും കര്ഷകര്ക്കു വേണ്ടി ശബ്ദം ഉയര്ത്തുകയും വിവിധ മനുഷ്യാവകാശ വിഷയങ്ങളില് കേന്ദ്രത്തിനെതിരെ ശബ്ദിക്കുകയും ചെയ്തതിനു പിന്നാലെയാണ് തന്റെ ഫോളവേഴ്സിന്റെ കാര്യത്തില് ഇടിവുണ്ടായതെന്നും ഇത് തീര്ത്തും നിഷ്കളങ്കമല്ലെന്നും രാഹുല് പറഞ്ഞു. ഡല്ഹിയില് പീഡനത്തിനിരയായി കൊല്ലപ്പെട്ട ഒന്പതുകാരിയുടെ ബന്ധുക്കളെ രാഹുല് സന്ദര്ശിച്ചതിനു പിന്നാലെ പെണ്കുട്ടിയെ തിരിച്ചറിയാന് കഴിയുന്നതരത്തില് ബന്ധുക്കളുടെ ചിത്രം പോസ്റ്റ് ചെയ്തുവെന്ന് ചൂണ്ടിക്കാട്ടി ചിത്രം ട്വിറ്റര് നീക്കം ചെയ്തിരുന്നു. രാഹുലിന്റെ ട്വിറ്റര് അക്കൗണ്ടിന് താല്ക്കാലികമായി വിലക്കേര്പ്പെടുത്തിയതായി കോണ്ഗ്രസ് അറിയിച്ചുവെങ്കിലും ട്വിറ്റര് നിഷേധിച്ചു. വിഷയത്തില് തുടര്നടപടിക്കായി ദേശീയ ബാലാവകാശ കമ്മിഷന് ട്വിറ്ററിന് നോട്ടിസ് നല്കിയിരുന്നു.